रायगड, 21 जानेवारी (हिं.स.)। राष्ट्रीय मतदार दिवस २५ जानेवारी रोजी जिल्हाधिकारी कार्यालय, नियोजन भवन येथे साजरा केला जाणार आहे. भारत निर्वाचन आयोग व महाराष्ट्र राज्याचे मुख्य निर्वाचन अधिकारी यांचे निर्देशानुसार हा कार्यक्रम आयोजित करण्यात येत आहे. याबाबत उपजिल्हाधिकारी व उपजिल्हा निवडणूक अधिकारी नितीन वाघमारे यांनी पत्रकार परिषदेद्वारे माहिती दिली.

जिल्हाधिकारी व जिल्हा निवडणूक अधिकारी किशन जावळे यांच्या अध्यक्षतेखाली हा राष्ट्रीय मतदार दिवस कार्यक्रम सकाळी ११ वाजता सुरू होईल. या कार्यक्रमात निवडणूक प्रक्रियेतील महत्व, मतदानाचे अधिकार, जबाबदाऱ्या आणि मतदारांचे कर्तव्य याबाबत मार्गदर्शन दिले जाणार आहे. तसेच युवकांना मतदान प्रक्रियेतील सहभाग वाढविण्यासाठी विशेष माहिती सत्राचे आयोजन केले जाईल.

कार्यक्रमात विविध शाळा, महाविद्यालये, सामाजिक संघटना आणि नागरिक प्रतिनिधी सहभागी होतील. यावेळी मतदार नोंदणी, ई-मतदार यादीतील सुधारणा आणि जागरूकता मोहिमेबाबतही माहिती देण्यात येईल. जिल्हाधिकारी किशन जावळे यांनी सर्व नागरिकांना हा कार्यक्रम पाहण्याचे आणि मतदान प्रक्रियेतील सहभाग वाढवण्याचे आवाहन केले आहे.

उपजिल्हाधिकारी नितीन वाघमारे म्हणाले, “मतदार दिन हा प्रत्येक नागरिकासाठी महत्त्वाचा आहे. हा दिवस केवळ उत्सव नव्हे, तर आपल्या मतदानाच्या अधिकारांची जाणीव करून देण्याचा एक संधी आहे. आपण सर्वांनी सक्रिय सहभागी होऊन लोकशाही प्रक्रियेला बळकटी द्यावी.”

रायगड जिल्ह्यातील प्रशासनाने या कार्यक्रमाची तयारी पूर्ण केली असून, सुरक्षित आणि सुव्यवस्थित आयोजन सुनिश्चित केले आहे. सर्व नागरिकांनी या राष्ट्रीय मतदार दिवसाचे औचित्यपूर्ण रितीने पालन करावे, असे आवाहन जिल्हाधिकारी कार्यालयाकडून करण्यात आले आहे.

---------------

हिंदुस्थान समाचार / संदेश साळुंके