द बॅड्स ऑफ बॉलीवूड या वेब सिरीजविरुद्ध दाखल केलेली याचिका दिल्ली उच्च न्यायालयाने फेटाळली

नवी दिल्ली, २९ जानेवारी (हिं.स.)माजी नार्कोटिक्स कंट्रोल ब्युरो अधिकारी समीर वानखेडे यांनी नेटफ्लिक्स, शाहरुख खान आणि आर्यन खान ड्रग्ज प्रकरणाशी संबंधित वेब सिरीज द बॅड्स ऑफ बॉलीवूड च्या निर्मात्यांविरुद्ध दाखल केलेली मानहानीची याचिका दिल्ली उच्च न्यायालयाने फेटाळली आहे. न्यायमूर्ती पुष्पेंद्र कौरव यांच्या खंडपीठाने ही याचिका फेटाळली.

उच्च न्यायालयाने म्हटले आहे की, हे न्यायालय याचिकेवर सुनावणी करण्यासाठी योग्य मंच नाही. न्यायालयाने समीर वानखेडे यांना योग्य मंचावर त्यांची बाजू मांडण्याची परवानगी दिली. समीर वानखेडे यांनी शाहरुख खान, त्यांची पत्नी गौरी खान यांची कंपनी रेड चिलीज एंटरटेनमेंट आणि इतर पक्षांकडून २ कोटी रुपयांची नुकसानभरपाई मागितली होती. वानखेडे यांनी आरोप केला होता की, वेब सिरीजमध्ये त्यांचे नकारात्मक चित्रण करण्यात आले आहे. या मालिकेने केवळ समीर वानखेडेच नव्हे तर तपास यंत्रणेचीही प्रतिमा खराब करण्याचा प्रयत्न केला.

समीर वानखेडे आणि आर्यन खान यांचा खटला सध्या मुंबई उच्च न्यायालय आणि ट्रायल कोर्टात प्रलंबित आहे, त्यामुळे या विषयावर वेब सिरीज तयार करणे हे न्यायालयाच्या कामात हस्तक्षेप करण्यासारखे आहे, असे याचिकेत म्हटले आहे. समीर वानखेडे यांच्या प्रतिमेला झालेल्या नुकसानीची भरपाई न्यायालयाने टाटा मेमोरियल हॉस्पिटलला द्यावी, असे याचिकेत म्हटले आहे.वानखेडे यांच्या याचिकेत म्हटले आहे की, वेब सिरीजमधील मजकूर माहिती तंत्रज्ञान कायदा आणि भारतीय दंड संहितेच्या अनेक तरतुदींचे उल्लंघन करतो, कारण तो अश्लील आणि आक्षेपार्ह मजकुराद्वारे राष्ट्रीय भावना दुखावण्याचा प्रयत्न करतो.----------------

हिंदुस्थान समाचार / वृषाली देशपांडे