नवी दिल्ली, 29 जानेवारी, (हिं.स.) सुरक्षेच्या कारणास्तव भारतात होणाऱ्या आगामी टी-२० विश्वचषक स्पर्धेतून आपल्या राष्ट्रीय क्रिकेट संघाला दूर ठेवणाऱ्या निर्णय बांग्लादेशच्या सरकारने घेतला. पण त्याच सरकारने पुढील महिन्यात होणाऱ्या आशियाई रायफल आणि पिस्तूल चॅम्पियनशिपसाठी त्यांच्या नेमबाजांना भारतात जाण्याची परवानगी दिली आहे. टी-२० विश्वचषक ७ फेब्रुवारी ते ८ मार्च दरम्यान भारत आणि श्रीलंकेतील विविध ठिकाणी होणार आहे, तर प्रतिष्ठित आशियाई नेमबाजी स्पर्धा २ ते १४ फेब्रुवारी दरम्यान नवी दिल्लीतील डॉ. करणी सिंग शूटिंग कॉम्प्लेक्स येथे होणार आहे.

१७ देशांतील ३०० हून अधिक नेमबाज या स्पर्धेत सहभागी होतील. बांगलादेशचे दोन रायफल नेमबाज तीन स्पर्धांमध्ये भाग घेणार आहेत. बांगलादेशचे प्रतिनिधित्व महिला नेमबाज शर्मीन अख्तर आणि २६ वर्षीय ऑलिंपियन मोहम्मद रोबिउल इस्लाम करतील. दोघेही १० मीटर एअर रायफल स्पर्धेत वैयक्तिक आणि मिश्र संघ स्पर्धेत भाग घेतील. बांगलादेश शूटिंग फेडरेशनच्या सरचिटणीस अलेया फिरदौसी यांनी याची पुष्टी केली.

बांगलादेशने क्रिकेट संघाने विश्वचषकातून माघार घेतल्यानंतर, सुरक्षेच्या कारणास्तव त्यांचा नेमबाजी संघही भारतात येण्यास नकार देऊ शकतो अशी शक्यता वर्तवली जात होती. पण राष्ट्रीय रायफल असोसिएशन ऑफ इंडिया (एनआरएआय) यांनी या शक्यता फेटाळून लावल्या. एनआरएआयचे सचिव राजीव भाटिया यांनी स्पष्टपणे सांगितले की, आतापर्यंत, बांगलादेश संघ येत नसल्याची कोणतीही माहिती नाही. त्यांचा संघ येत आहे यात काही शंका नाही. ते पुढे म्हणाले, एनआरएआय म्हणून, आम्ही त्यांच्या (बांगलादेश फेडरेशनच्या अधिकाऱ्यांशी) सतत संपर्कात आहोत. परराष्ट्र मंत्रालयाने मान्यता दिली आहे आणि आम्ही ती (भारतीय) दूतावासाकडे व्हिसा प्रक्रियेसाठी पाठवली आहे.

टी-२० विश्वचषकाबाबत बांगलादेश सरकारची भूमिका सुरुवातीपासूनच वादग्रस्त होती. त्यांनी आपला क्रिकेट संघ पाठवण्यास नकार दिला, ज्यामुळे भारतातील सुरक्षेबाबत चिंता निर्माण झाली आणि आंतरराष्ट्रीय क्रिकेट समुदायात वादविवाद सुरू झाले. पण आता त्याच काळात भारतात होणाऱ्या दुसऱ्या आंतरराष्ट्रीय क्रीडा स्पर्धेसाठी खेळाडूंना परवानगी देण्यात आली आहे, त्यामुळे सुरक्षा चिंता केवळ क्रिकेटपुरती मर्यादित होती का असे प्रश्न उपस्थित होणे स्वाभाविक आहे.

बांगलादेश सरकारचा असा विश्वास आहे की, शूटिंग स्पर्धेमुळे कोणताही मोठा सुरक्षा धोका नाही, कारण ही स्पर्धा एका सुरक्षित, इनडोअर ठिकाणी (कर्णी सिंग शूटिंग कॉम्प्लेक्स) आयोजित केली जात आहे. यावरून बांगलादेशचा दुटप्पीपणा उघड होत आहे.

---------------

हिंदुस्थान समाचार / वृषाली देशपांडे