नवी दिल्ली, 11 ऑक्टोबर (हिं.स.)। कॉकरोच जनता पार्टी (सीजेपी)चे राष्ट्रीय प्रवक्ते आशुतोष रांका आणि सौरभ दास यांनी रविवारी विद्यार्थी संघटना आणि देशातील तरुणांना संविधान व लोकशाहीच्या रक्षणासाठी शांततेच्या मार्गाने रस्त्यावर उतरून विरोध नोंदवण्याचे आवाहन केले.
सीजेपीच्या प्रवक्त्यांनी दिल्लीतील प्रेस क्लब ऑफ इंडिया येथे आयोजित पत्रकार परिषदेला संबोधित केले. यावेळी त्यांनी केंद्र सरकार आणि दिल्ली पोलिसांवर लोकशाही दडपण्याचे तसेच शांततापूर्ण आंदोलने चिरडण्याचे गंभीर आरोप केले. शनिवारी आंदोलनादरम्यान दिल्लीचे रूपांतर लष्करी छावणीत करण्यात आले होते आणि देशात १९७५ साला सारखी अघोषित आणीबाणीची परिस्थिती निर्माण करण्यात आली होती, असा आरोप त्यांनी केला.
सौरभ दास यांनी आरोप केला की, दिल्ली विमानतळावर उतरताच दिल्ली पोलिसांनी त्यांना, आशुतोष रांका आणि अभिजीत दीपके यांना कोणतेही वैध कागदपत्र किंवा अटक वॉरंट नसताना जबरदस्तीने विमानातून ताब्यात घेतले. त्यांचे मोबाईल फोन जप्त करण्यात आले. मात्र, कायदेशीर प्रक्रियेनुसार आवश्यक असलेली जप्तीची यादीही त्यांना देण्यात आली नाही. ताब्यात असताना त्यांच्या डिजिटल उपकरणांमध्ये छेडछाड केली जाण्याची किंवा त्यामध्ये खोटा डेटा टाकला जाण्याची शक्यता असल्याची भीती त्यांनी व्यक्त केली. तसेच, ताब्यात असताना वकिलांशी संपर्क साधण्याच्या मूलभूत अधिकारापासूनही वंचित ठेवल्याचा आरोप त्यांनी केला.
राष्ट्रीय मानवाधिकार आयोग (एनएचआरसी) आणि न्यायपालिकेच्या मौनावर प्रश्न उपस्थित करत दास यांनी न्यायालयांनी या संपूर्ण प्रकरणाची स्वतःहून दखल घ्यावी, अशी मागणी केली. याला कायदेशीर भाषेत ‘सुओ मोटो’ असे म्हटले जाते. मुख्य निवडणूक आयुक्तांना वाचवण्यासाठी आणि व्यवस्थेतील त्रुटी लपवण्यासाठी ही संपूर्ण कारवाई केली जात असल्याचा आरोप त्यांनी केला. देशात मोठ्या प्रमाणावर मतदारांच्या, विशेषतः तरुण आणि जेन-झी मतदारांच्या अधिकारांकडे दुर्लक्ष करण्यात आल्याचा दावाही त्यांनी केला.
दुसरीकडे, आशुतोष रांका म्हणाले की, शनिवारी सीमावर्ती आणि नक्षलग्रस्त भागांतून सीमा सुरक्षा दल (बीएसएफ) तसेच इतर केंद्रीय दलांच्या तुकड्या बोलावून ४० हजारांहून अधिक जवान तैनात करण्यात आले होते. ५७ मेट्रो स्थानके, आंतरराज्य रेल्वे सेवा आणि राजधानीतील प्रमुख रेल्वेगाड्यांच्या वाहतुकीत अडथळे निर्माण करण्यात आले. सामान्य नागरिकांच्या ये-जा करण्यावर आणि व्यावसायिक व्यवहारांवर अघोषित निर्बंध लादून आंदोलनाविरोधात वातावरण निर्माण करण्याचा प्रयत्न करण्यात आला, असा आरोप त्यांनी केला.
गुरुद्वारा बंगला साहिब येथे आश्रय घेतलेल्या आंदोलकांना बाहेर काढण्यासाठी सुरक्षा कर्मचाऱ्यांनी धार्मिक मर्यादांचे उल्लंघन केल्याचा आरोपही त्यांनी केला. याशिवाय, सीजेपीचे मुंबई समन्वयक प्रणय यांना ताब्यात घेतल्यानंतर त्यांच्याशी क्रूर वर्तन करण्यात आले आणि त्यांच्यावर हिंसाचार करण्यात आल्याचा दावाही करण्यात आला.
---------------
हिंदुस्थान समाचार / Suraj Chaugule
