अबुधाबी, 13 ऑक्टोबर (हिं.स.)।दुबईहून तेल अवीवला जाणाऱ्या विमानात सहवैमानिकाने हल्ला केल्याच्या प्रकरणात मोठी बातमी समोर आली आहे. प्रसारमाध्यमांच्या वृत्तानुसार, संयुक्त अरब अमिरातीच्या (यूएई) पोलिसांनी फ्लाय दुबईसाठी काम करणाऱ्या मालदीवच्या दोन वैमानिकांना अटक केली आहे. ओमानचा नागरिक असलेल्या सहवैमानिक अल-हम्मामी याने दुबई-तेल अवीव विमानाचे अपहरण करून ते कोसळवण्याचा कथित प्रयत्न केल्याप्रकरणी ही कारवाई करण्यात आली आहे.

मालदीवच्या माध्यमांच्या वृत्तानुसार, या दोन्ही वैमानिकांना ३ ऑक्टोबर रोजी ताब्यात घेण्यात आले होते. संयुक्त अरब अमिरातीतील मालदीवच्या दूतावासाने त्यांच्या कुटुंबीयांना या अटकेबाबत अधिकृतपणे माहिती दिली आहे. दरम्यान, मालदीवच्या अधिकाऱ्यांनी या दोन्ही वैमानिकांच्या अटकेवर भाष्य करण्यास नकार दिला आहे. तसेच, त्यांच्यावरील आरोप किंवा या प्रकरणातील त्यांच्या संभाव्य सहभागाच्या तपासाबाबत यूएईच्या अधिकाऱ्यांनीही अद्याप कोणतीही अधिकृत माहिती दिलेली नाही.

३० सप्टेंबर रोजी घडलेल्या या घटनेच्या तपासाची व्याप्ती यूएईच्या अधिकाऱ्यांनी वाढवल्यानंतर ही अटक करण्यात आली. या घटनेत फ्लाय दुबईचा सहवैमानिक हम्माम अल-हम्मामी सहभागी असल्याचा आरोप आहे. तो ओमानचा नागरिक आहे. विमानाचा ताबा घेऊन ‘दहशतवादी हल्ला’ करण्याच्या कथित प्रयत्नादरम्यान त्याने विमानाचे मुख्य वैमानिक कॅप्टन मच्छार यांच्यावर कुऱ्हाडीने हल्ला केल्याचा आरोप आहे.

माले येथील वृत्तपत्राच्या वृत्तानुसार, अटक करण्यात आलेले दोन्ही वैमानिक त्यांच्या कामाच्या ठिकाणी अल-हम्मामीच्या संपर्कात होते, असे मानले जाते. तसेच, अल-हम्मामी राहत असलेल्या इमारतीतच तेही राहत असल्याचे सांगितले जाते. तथापि, या घटनेशी त्यांचा नेमका काय संबंध होता किंवा त्यांच्याविरोधात कोणते पुरावे आहेत, याबाबत अधिकाऱ्यांनी अद्याप अधिकृत माहिती जाहीर केलेली नाही. वृत्तानुसार, फ्लाय दुबईसाठी वैमानिक म्हणून काम करणाऱ्या मालदीवच्या सहा नागरिकांमध्ये या दोघांचाही समावेश आहे. या सहा जणांपैकी या दोघांची नियुक्ती सर्वांत अलीकडे झाल्याचे सांगितले जाते.

---------------

हिंदुस्थान समाचार / Priyanka Bansode