मुंबई, १४ ऑक्टोबर, (हिं.स) : अभिनेता आयुष्मान खुराना याचा आगामी चित्रपट 'उडता तीर'चा दुसरा ट्रेलर प्रेक्षकांना विनोद, ॲक्शन आणि मनोरंजनाच्या एका वेगळ्याच विश्वाची झलक दाखवतो. आयुष्मान आणि सारा अली खान यांची मुख्य भूमिका असलेला हा चित्रपट देशभक्ती, विनोद आणि ॲक्शन यांचे अनोखे मिश्रण असल्याचे सांगितले जात आहे. हा चित्रपट २३ ऑक्टोबरला चित्रपटगृहात प्रदर्शित होणार आहे.

चित्रपटाच्या कथानकाबद्दल बोलताना आयुष्मान म्हणाला, जेव्हा तुम्हाला वाटते की 'उडता तीर'ची कथा कोणत्या दिशेने चालली आहे हे समजले आहे, तेव्हाच ती एक नवीन वळण घेते. त्याने नमूद केले की, विविध शैलींचे (genres) एकत्रीकरण ही या चित्रपटाची सर्वात मोठी खासियत आहे. त्याच्या मते, देशभक्ती, ॲक्शन आणि विनोद यांची अशा अपारंपरिक शैलीत मांडणी केल्यामुळे प्रेक्षकांना एक नाविन्यपूर्ण अनुभव मिळेल. चित्रपटातील अनपेक्षित वळणे आणि विनोद प्रेक्षकांचे पुरेपूर मनोरंजन करतील, अशी आशा अभिनेत्याने व्यक्त केली आहे.

आकाश ए. कौशिक यांनी लेखन आणि दिग्दर्शन केलेल्या या चित्रपटात आयुष्मान आणि सारा यांच्यासोबत मुकुल देव, राम कपूर, रघुबीर यादव, बृजेंद्र काला, गुलशन ग्रोव्हर, सुहेल नय्यर, राहुल बोस आणि सुप्रिया पिळगावकर यांच्याही भूमिका आहेत. याची निर्मिती करण जोहर, आदर पूनावाला, अपूर्वा मेहता, गुनीत मोंगा कपूर आणि अचिन जैन यांनी 'धर्मा प्रॉडक्शन्स' आणि 'सिख्या एंटरटेनमेंट'च्या बॅनरखाली केली आहे.

---------------

हिंदुस्थान समाचार / हर्षदा गावकर