गुंतवणूकदारांना नोटीस पाठवून दिली माहिती

नवी दिल्ली, 16 ऑक्टोबर (हिं.स.)। देशात सणासुदीच्या हंगामाला सुरुवात होत असतानाच गोल्ड ईटीएफ फंड ऑफ फंड्स (एफओएफ) मधील गुंतवणुकीवर तात्पुरती बंदी घालण्यात आली आहे. ही बंदी आजपासूनच लागू झाली आहे. बाजार नियामक सिक्युरिटीज अँड एक्स्चेंज बोर्ड ऑफ इंडिया (सेबी)च्या निर्देशांनुसार, देशातील अनेक मोठ्या म्युच्युअल फंड कंपन्यांनी हे पाऊल उचलले आहे. यासंदर्भात विद्यमान गुंतवणूकदारांना नोटीस पाठवून माहितीही देण्यात आली आहे.

यासंदर्भात मिळालेल्या माहितीनुसार, या निर्बंधांनंतर गुंतवणूकदारांना संबंधित म्युच्युअल फंड कंपन्यांच्या गोल्ड ईटीएफ एफओएफमध्ये नव्याने एकरकमी गुंतवणूक करता येणार नाही. तसेच नवीन एसआयपी सुरू करण्यावरही बंदी घालण्यात आली आहे. याशिवाय, सध्या सुरू असलेल्या एसआयपीमधील गुंतवणुकीची रक्कम वाढवणे, म्हणजेच टॉप-अप किंवा स्टेप-अप करण्यावरही तात्पुरती बंदी घालण्यात आली आहे. काही फंड कंपन्यांनी नवीन सिस्टेमॅटिक ट्रान्सफर प्लॅन (एसटीपी) नोंदणी आणि स्विच-इन व्यवहारही तूर्तास थांबवले आहेत.

गोल्ड ईटीएफ एफओएफवरील ही बंदी लागू करणाऱ्या प्रमुख म्युच्युअल फंड कंपन्यांमध्ये आयसीआयसीआय प्रुडेंशियल, एचडीएफसी, आदित्य बिर्ला सन लाइफ, इन्व्हेस्को इंडिया, डीएसपी, टाटा आणि श्रीराम म्युच्युअल फंड यांचा समावेश आहे. असोसिएशन ऑफ म्युच्युअल फंड्स इन इंडियाच्या माध्यमातून मिळालेल्या सेबीच्या निर्देशांचा हवाला देत श्रीराम म्युच्युअल फंडाने या निर्बंधांची घोषणा केली आहे. मात्र, ही तात्पुरती बंदी घालण्यामागील कारण अद्याप स्पष्ट करण्यात आलेले नाही.

दरम्यान, डीएसपी म्युच्युअल फंडाने स्पष्ट केले आहे की, १५ ऑक्टोबर रोजी दुपारी तीन वाजण्याच्या निर्धारित कट-ऑफ वेळेनंतर प्राप्त झालेल्या सर्व अर्जांना नाकारले जाऊ शकते. अशा परिस्थितीत गुंतवणूकदारांची रक्कम त्यांना परत केली जाईल. याशिवाय, कोटक महिंद्रा, यूटीआय आणि एचडीएफसी म्युच्युअल फंड यांसारख्या प्रमुख कंपन्यांनीही गोल्ड ईटीएफमध्ये एकाच वेळी मोठ्या प्रमाणात गुंतवणूक अर्थात बल्क सबस्क्रिप्शन रोखण्यासाठी स्वतंत्र नोटिसा जारी केल्या आहेत.

उल्लेखनीय म्हणजे, गोल्ड ईटीएफ एफओएफ या म्युच्युअल फंडाच्या अशा योजना आहेत, ज्यामध्ये गुंतवणूकदारांकडून पैसे जमा करून ते थेट गोल्ड ईटीएफमध्ये गुंतवले जातात. दसरा आणि दिवाळीसारख्या मोठ्या सणांच्या अगदी आधी गुंतवणुकीवरील हे निर्बंध लागू झाले आहेत. भारतीय कुटुंबांमध्ये पारंपरिकरीत्या या काळात सोन्याची मागणी सर्वोच्च स्तरावर असते.

गेल्या वर्षी सणासुदीच्या काळात शेअर बाजारातून अपेक्षेइतका परतावा मिळत नसल्यामुळे सोने आणि चांदीच्या ईटीएफमध्ये मोठ्या प्रमाणात गुंतवणूक झाली होती. मात्र, यंदा बाजारात सोन्याची मागणी काहीशी नरम राहिली आहे. भारतातील सोन्याच्या आयातीच्या आकडेवारीवरूनही याचा अंदाज येतो. ऑगस्टमध्ये २३० कोटी डॉलर असलेली सोन्याची आयात सप्टेंबरमध्ये घटून १८० कोटी डॉलरवर आली आहे.

---------------

हिंदुस्थान समाचार / Suraj Chaugule