नवी दिल्ली, 18 ऑक्टोबर (हिं.स.)। सोमवार म्हणजेच १९ ऑक्टोबरपासून सुरू होणाऱ्या व्यावसायिक आठवड्यात प्रायमरी मार्केटमध्ये नवीन आयपीओ दाखल होण्याच्या दृष्टीने मर्यादित हालचाल पाहायला मिळणार आहे. या आठवड्यात जिओ प्लॅटफॉर्म्ससह दोन मोठ्या कंपन्या आपले आयपीओ आणत आहेत. हे दोन्ही आयपीओ मेनबोर्ड सेगमेंटमधील आहेत. या दोन नवीन आयपीओंसोबतच गेल्या आठवड्यात खुले झालेले अन्य चार मेनबोर्ड आयपीओ आणि एक एसएमई आयपीओ यांच्यासाठीही आठवड्याच्या पहिल्या दिवशी गुंतवणूकदारांना बोली लावता येणार आहे. या आठवड्यात एकूण नऊ कंपन्या शेअर बाजारात प्रवेश करणार आहेत. त्यामुळे लिस्टिंगच्या दृष्टीनेही हा आठवडा व्यस्त ठरणार आहे.

या आठवड्यातील तिसऱ्या व्यावसायिक दिवशी, म्हणजेच २१ ऑक्टोबर रोजी रिलायन्स इंडस्ट्रीजची डिजिटल आणि दूरसंचार क्षेत्रातील कंपनी जिओ प्लॅटफॉर्म्सचा ३०,२१३ कोटी रुपयांचा मोठा आयपीओ सबस्क्रिप्शनसाठी खुला होणार आहे. या इश्यूमध्ये २३ ऑक्टोबरपर्यंत बोली लावता येईल. आयपीओसाठी प्रति शेअर १,०६५ रुपये ते १,११९ रुपये असा प्राइस बँड निश्चित करण्यात आला आहे, तर लॉट साइज १२ शेअर्सचा आहे. आयपीओ बंद झाल्यानंतर कंपनीचे शेअर्स २८ ऑक्टोबर रोजी बीएसई आणि एनएसईवर लिस्ट होण्याची शक्यता आहे. हा भारताच्या इतिहासातील आतापर्यंतचा सर्वांत मोठा आयपीओ ठरणार आहे.

२१ ऑक्टोबर रोजी जिओ प्लॅटफॉर्म्ससोबतच आरोग्यसेवा क्षेत्रातील मोठी कंपनी पारस हेल्थकेअरचा १,४५० कोटी रुपयांचा आयपीओदेखील सबस्क्रिप्शनसाठी खुला होणार आहे. या पब्लिक इश्यूमध्येही गुंतवणूकदारांना २३ ऑक्टोबरपर्यंत बोली लावता येईल. कंपनीने या आयपीओसाठी प्रति शेअर ६६० रुपये ते ६९३ रुपये असा प्राइस बँड निश्चित केला आहे, तर लॉट साइज २१ शेअर्सचा आहे. इश्यू बंद झाल्यानंतर कंपनीचे शेअर्स २८ ऑक्टोबर रोजी बीएसई आणि एनएसईवर लिस्ट होण्याची अपेक्षा आहे.

या नवीन आयपीओंशिवाय, गेल्या आठवड्यात १५ ऑक्टोबर रोजी सबस्क्रिप्शनसाठी खुल्या झालेल्या जेटवर्क मॅन्युफॅक्चरिंग बिझनेसेसच्या ५,०१२.३३ कोटी रुपयांच्या मोठ्या आयपीओसाठी उद्या म्हणजेच १९ ऑक्टोबरपर्यंत बोली लावता येणार आहे. या आयपीओमध्ये गुंतवणूकदारांना प्रति शेअर १४३ रुपये ते १५१ रुपये या प्राइस बँडमध्ये बोली लावता येईल. याचा लॉट साइज ९९ शेअर्सचा आहे. इश्यू बंद झाल्यानंतर २३ ऑक्टोबर रोजी कंपनीचे शेअर्स शेअर बाजारात लिस्ट होऊ शकतात. या पब्लिक इश्यूला आतापर्यंत ०.३१ पट सबस्क्रिप्शन मिळाले आहे.

त्याचप्रमाणे, १५ ऑक्टोबर रोजीच खुला झालेला बोनफिग्लिओली ट्रान्समिशनचा २,५३३.६६ कोटी रुपयांचा आयपीओदेखील उद्या म्हणजेच १९ ऑक्टोबर रोजी बंद होणार आहे. या आयपीओसाठी प्रति शेअर ५५८ रुपये ते ५८६ रुपये असा प्राइस बँड निश्चित करण्यात आला आहे, तर लॉट साइज २५ शेअर्सचा आहे. पूर्णपणे ऑफर फॉर सेल असलेल्या या इश्यूची लिस्टिंगही २३ ऑक्टोबर रोजी नियोजित आहे. दुसऱ्या दिवसाची बोली संपेपर्यंत या आयपीओला ०.९९ पट सबस्क्रिप्शन मिळाले होते.

याशिवाय, गेल्या आठवड्यात खुल्या झालेल्या टोंबो इमेजिंग इंडियाच्या ८५२.१८ कोटी रुपयांच्या आयपीओमध्येही सोमवार, १९ ऑक्टोबरपर्यंतच अर्ज करता येणार आहेत. कंपनीने यासाठी प्रति शेअर ६६५ रुपये ते ७०० रुपये असा प्राइस बँड निश्चित केला आहे. या आयपीओचा लॉट साइज २१ शेअर्सचा आहे. गुंतवणूकदारांकडून या इश्यूला चांगला प्रतिसाद मिळाला असून, दुसऱ्या दिवसाच्या अखेरीस तो ७.७७ पट सबस्क्राइब झाला होता. या कंपनीचे शेअर्सही २३ ऑक्टोबर रोजी एनएसई आणि बीएसईच्या माध्यमातून शेअर बाजारात दाखल होण्याची शक्यता आहे.

सबस्क्रिप्शनसाठी खुला असलेला चौथा आयपीओ सहजानंद मेडिकल टेक्नॉलॉजीज (एसएमटी) यांचा असून, त्याचा आकार ४७५.४८ कोटी रुपये आहे. या इश्यूमध्येही १९ ऑक्टोबरपर्यंत बोली लावता येईल. यामध्ये गुंतवणुकीसाठी प्रति शेअर ३२७ रुपये ते ३४४ रुपये असा प्राइस बँड निश्चित करण्यात आला आहे, तर लॉट साइज ४३ शेअर्सचा आहे. या आयपीओची लिस्टिंग आठवड्याच्या शेवटच्या व्यावसायिक दिवशी, म्हणजेच २३ ऑक्टोबर रोजी बीएसई आणि एनएसईवर होणार आहे.

मेनबोर्डवरील या चार आयपीओंशिवाय, एसएमई सेगमेंटमधील शेल्ज इंडियाच्या आयपीओसाठीही १९ ऑक्टोबरपर्यंत बोली लावता येणार आहे. या आयपीओचा आकार ५९.९७ कोटी रुपये आहे. यासाठी प्रति शेअर १७० रुपये ते १७९ रुपये असा प्राइस बँड निश्चित करण्यात आला आहे, तर लॉट साइज ८०० शेअर्सचा आहे. इश्यू बंद झाल्यानंतर २३ ऑक्टोबर रोजी कंपनीचे शेअर्स बीएसईच्या एसएमई प्लॅटफॉर्मवर लिस्ट होऊ शकतात.

लिस्टिंगचा विचार करता, या आठवड्यातील तिसऱ्या व्यावसायिक दिवशी, म्हणजेच २१ ऑक्टोबर रोजी एचडी फायर प्रोटेक्टचे शेअर्स बीएसई आणि एनएसईवर लिस्ट होऊन व्यवहाराला सुरुवात करतील. याच दिवशी वैभव व्यापार लिमिटेडचे शेअर्स एनएसईच्या एसएमई प्लॅटफॉर्मवर लिस्ट होण्याची शक्यता आहे.

त्यानंतर २२ ऑक्टोबर रोजी फ्युजन सीएक्सचे शेअर्स एनएसई आणि बीएसईवर, तर रविता इंजिनिअरिंग सर्व्हिसेसचे शेअर्स एनएसईच्या एसएमई प्लॅटफॉर्मवर लिस्ट होऊन शेअर बाजारात प्रवेश करतील.

यानंतर आठवड्याच्या शेवटच्या व्यावसायिक दिवशी, म्हणजेच २३ ऑक्टोबर रोजी जेटवर्क, बोनफिग्लिओली ट्रान्समिशन, टोंबो इमेजिंग आणि सहजानंद मेडिकल टेक्नॉलॉजीज या कंपन्यांचे शेअर्स बीएसई आणि एनएसईवर लिस्ट होतील. त्याच दिवशी एसएमई सेगमेंटमधील शेल्ज इंडियाचे शेअर्सही बीएसईच्या एसएमई प्लॅटफॉर्मवर लिस्ट होऊन शेअर बाजारात प्रवेश करतील.

---------------

हिंदुस्थान समाचार / Suraj Chaugule