जेरुसलेम, 02 ऑक्टोबर (हिं.स.)।फ्लायदुबईच्या विमान घटनेला एक दिवस उलटूनही तपास अधिकाऱ्यांना ओमानच्या या सहपायलटने त्याच्यासोबत विमान चालवत असलेल्या कॅप्टन मच्छार यांच्यावर हल्ला का केला, याचा उलगडा झालेला नाही. दुसरीकडे, इस्रायलचे पंतप्रधान बेंजामिन नेतन्याहू यांनी मोठा दावा केला आहे. पायलट मच्छार यांच्यावर हल्ला करणाऱ्या ओमानी सहपायलटचे ब्रेनवॉश करण्यात आले होते, असा दावा त्यांनी केला. त्याला कट्टरतावादी प्रशिक्षण देण्यात आल्याचेही नेतन्याहू यांनी म्हटले आहे.

इस्रायलचे पंतप्रधान बेंजामिन नेतन्याहू यांनी एका मुलाखतीत दावा करताना सांगितले की, “ ताब्यात घेतल्यानंतर सहपायलटने विमानातील कर्मचाऱ्यांना उद्देशून आरडाओरड केली होती. तो वारंवार, “मला मारून टाका, मला मारून टाका,” असे ओरडत होता. नेतन्याहू म्हणाले, “तो आत्महत्या करू इच्छित होता, यात कोणतीही शंका नाही.” तसेच, “त्या व्यक्तीला विमान पाडायचे होते, अशी शक्यता खूप जास्त आहे,” असेही त्यांनी सांगितले.मात्र, या प्रकरणात अद्याप कोणताही अंतिम निष्कर्ष काढलेला नसल्याचे नेतन्याहू यांनी स्पष्ट केले. ते म्हणाले की, सहपायलटच्या इस्लामी विचारसरणी आणि त्याच्या पार्श्वभूमीबाबत मिळालेल्या माहितीकडे पाहता त्यातून तपासाला काही संकेत मिळू शकतात; मात्र सध्या त्याबाबत निश्चित निष्कर्ष काढता येणार नाही.

सहपायलटचे नाव अद्याप जाहीर करण्यात आलेले नाही. इस्रायली अधिकाऱ्यांच्या म्हणण्यानुसार, तो ओमानचा नागरिक आहे. त्याला सौदी अरेबियातून अबू धाबी येथे नेण्यात आले असून, तेथे त्याला ताब्यात घेण्यात आले आहे.इस्रायली अधिकाऱ्यांनी सांगितले की, या तपासावर ते लक्ष ठेवणार असून, गरज पडल्यास तपासात सहभागीही होऊ शकतात.

संयुक्त अरब अमिरातीच्या सरकारने गुरुवारी सांगितले की, ही घटना दहशतवादाशी संबंधित होती का, याचा तपास करण्याचे नेतृत्व यूएई करणार आहे. तपास अधिकाऱ्यांना अद्याप हे स्पष्ट करायचे आहे की, सहपायलटने हा हल्ला एकट्याने केला का, त्याचा नेमका हेतू काय होता आणि त्याला विमान पाडायचे होते की विमानाचा ताबा घेऊन एखाद्या तिसऱ्या देशात उतरवायचे होते.

प्रवासी आणि अधिकाऱ्यांनी कॅप्टन मच्छार यांच्यावर “चाकूने हल्ला” करण्यात आल्याचे सांगितले आहे. मात्र, वापरण्यात आलेल्या शस्त्राबाबत अधिकृत माहिती देण्यात आलेली नाही. नेतन्याहू यांनी मात्र कॅप्टनवर कुऱ्हाडीने हल्ला करण्यात आल्याचे म्हटले आहे.

इस्रायलसमोरील महत्त्वाचा प्रश्न म्हणजे संशयित व्यक्ती सुरक्षा तपासणीतून कशी सुटली, हा आहे. ओमान आणि इस्रायल यांच्यात औपचारिक राजनैतिक संबंध नाहीत. वृत्तानुसार, इस्रायलला जाणाऱ्या विमानाचे उड्डाण करण्याची परवानगी त्या व्यक्तीला मिळायला नको होती.

इस्रायलच्या एका सुरक्षा अधिकाऱ्याने माध्यमाला सांगितले की, यूएईहून इस्रायलमध्ये येणाऱ्या सर्व विमान कंपन्यांच्या कर्मचाऱ्यांची सुरक्षा तपासणी इस्रायलची अंतर्गत सुरक्षा संस्था ‘शिन बेट’कडून केली जाते. दोन्ही देशांमधील विमान वाहतूक करारांतर्गत करण्यात आलेल्या अतिरिक्त सुरक्षा व्यवस्थेचा हा एक भाग आहे.

अधिकाऱ्याने सांगितले की, संशयिताची तपासणी करण्यात ‘शिन बेट’कडून काही त्रुटी राहिल्या का किंवा त्याची तपासणी करूनही त्याला विमान उड्डाणाची परवानगी देण्यात आली का, हे अद्याप स्पष्ट झालेले नाही.दरम्यान, इस्रायलचे पंतप्रधान बेंजामिन नेतन्याहू आणि भारताचे पंतप्रधान नरेंद्र मोदी या दोघांनीही कॅप्टन स्मित मच्छार यांच्या धाडसाचे कौतुक केले आहे.

---------------

हिंदुस्थान समाचार / Priyanka Bansode