पॅरिस (फ्रान्स), 22 ऑक्टोबर (हिं.स.)पॅरिसमध्ये सुरू असलेल्या फ्रेंच ओपन बॅडमिंटन स्पर्धेत, दोन वेळा ऑलिम्पिक पदक विजेती पी.व्ही. सिंधूने तिसऱ्या गेममधील चुरशीच्या लढतीत जिद्दीने पुनरागमन करत महिला एकेरीच्या दुसऱ्या फेरीत प्रवेश केला. दुसरीकडे, आयुष शेट्टीने पहिला गेम गमावल्यानंतर जोरदार पुनरागमन करत किदाम्बी श्रीकांतचा पराभव केला.

महिला जागतिक क्रमवारीत १० व्या क्रमांकावर असलेल्या सिंधूने 'अरेना ग्रँड पॅरिस' येथे झालेल्या पहिल्या फेरीच्या ६४ मिनिटांच्या सामन्यात थायलंडच्या सुपानिदा काटेथोंगचा २१-१४, ८-२१, २३-२१ असा पराभव केला.तिसऱ्या गेममध्ये सिंधू १९-८ अशी मोठी आघाडी घेऊन विजयाच्या दिशेने वाटचाल करत होती. मात्र, काटेथोंगने जबरदस्त पुनरागमन करत सलग ११ गुण मिळवले आणि १९-१९ अशी बरोबरी साधून सिंधूवर दबाव निर्माण केला.अखेर, सिंधूने प्रतिस्पर्ध्याचा हा वेग रोखला आणि निर्णायक क्षणी संयम राखत तिसरा गेम २३-२१ असा जिंकून स्पर्धेच्या दुसऱ्या फेरीत आपले स्थान निश्चित केले.

आयुष शेट्टीने माजी जागतिक क्रमवारीत अव्वल स्थानी राहिलेल्या किदाम्बी श्रीकांतविरुद्ध प्रभावी पुनरागमन करत १९-२१, २१-१६, २१-१२ असा विजय मिळवला आणि पुरुष एकेरीच्या दुसऱ्या फेरीत प्रवेश केला.पहिल्या गेममधील चुरशीच्या लढतीत पराभव पत्करल्यानंतर, आयुषने दुसऱ्या गेममध्ये जोरदार पुनरागमन करत सामन्यात बरोबरी साधली. निर्णायक गेममध्ये सुरुवातीला श्रीकांतने चार गुणांची आघाडी घेत सामन्यावर नियंत्रण मिळवले होते, पण आयुषने जोरदार पुनरागमन करत मध्यांतरापर्यंत ११-९ अशी आघाडी घेतली.सामना चुरशीचा सुरू असतानाच, शेवटच्या टप्प्यात आयुषने आपला खेळ अधिक आक्रमक केला. १४-१२ अशी आघाडी असताना त्याने सलग सात गुण मिळवत सामना जिंकला आणि एक शानदार पुनरागमन पूर्ण केले.

महिला एकेरीत, भारताच्या देविका सिहागने इंडोनेशियाच्या पाचव्या मानांकित पुत्री कुसुमा वर्दानीला तीन गेमपर्यंत झुंज दिली, पण अखेरीस तिला २१-९, १६-२१, २२-२० अशा फरकाने पराभव पत्करावा लागला. महिला दुहेरीत, रुतपर्णा पांडा आणि श्वेतापर्णा पांडा यांना जपानच्या रिरीना हिरामोतो आणि चिहारू शिदा यांच्याकडून २१-६, २१-११ असा पराभव पत्करावा लागल्याने स्पर्धेतून बाहेर पडावे लागले.

---------------

हिंदुस्थान समाचार / वृषाली देशपांडे