नागोया(जपान), २२ ऑक्टोबर (हिं.स.) भारतीय पॅरा ॲथलीट सुवर्णा राजने आशियाई पॅरा गेम्स २०२६ मध्ये महिलांच्या थाळीफेक एफ-५४ प्रकारात सुवर्णपदक जिंकून भारतासाठी दिवसातील पहिले सुवर्णपदक पटकावले. तिने १५.६६ मीटरच्या थ्रोसह अव्वल स्थान मिळवले. पॅरा बॅडमिंटन प्रकारात, मनीषा रामदास आणि प्रमोद भगत यांच्या जोडीने, तसेच कृष्णा नागर आणि नित्या श्री यांनीही कांस्यपदके जिंकली.

सहा खेळाडूंमध्ये झालेल्या थाळीफेक स्पर्धेत, सुवर्णाने तिच्या सहा प्रयत्नांपैकी चार प्रयत्नांत १५ मीटरपेक्षा जास्त अंतरावर थाळीफेक केली. तिची सर्वोत्तम कामगिरी पाचव्या प्रयत्नात झाली. इराणच्या शाहला हदीदीने १५.४५ मीटरच्या कामगिरीसह रौप्य पदक जिंकले, तर व्हिएतनामच्या न्गुयेन थी न्गोक थुईने १४.६५ मीटरच्या कामगिरीसह कांस्य पदक पटकावले.

उत्तर प्रदेशातील ग्रेटर नोएडाची रहिवासी असलेली सुवर्णा, एफ-५४ (F-54) गटात स्पर्धा करते. २०१७ पासून क्रीडा क्षेत्रात सक्रिय असलेल्या सुवर्णाने तीन आशियाई पॅरा गेम्समध्ये भारताचे प्रतिनिधित्व केले आहे. तिने ऑस्ट्रेलियातील कॅनबेरा येथे २०२६ मध्ये झालेल्या ट्रॅक मीटमध्ये थाळीफेकमध्ये सुवर्ण आणि गोळाफेकमध्ये रौप्य पदक जिंकले. तसेच, तिने दुबई येथे झालेल्या वर्ल्ड पॅरा ॲथलेटिक्स ग्रँड प्रिक्समध्ये कांस्य पदकही जिंकले.

पॅरा बॅडमिंटन मिश्र दुहेरी SL-3-SU-5 प्रकाराच्या उपांत्य फेरीत भारतीय जोडी मनीषा रामदास आणि प्रमोद भगत इंडोनेशियाच्या ओक्तिला लेनी रात्री आणि हिकमत रमदानी यांच्याकडून २१-१६, १३-२१, १७-२१ ने पराभूत झाली. भारतीय जोडीने पहिला गेम जिंकला, पण पुढील दोन गमावले. उपांत्य फेरीत पराभूत झाल्यामुळे मनीषा आणि प्रमोद यांना कांस्यपदक प्रदान करण्यात आले.

कृष्णा नागर आणि नित्या श्रीला कांस्यपदक

भारताच्या कृष्णा नागर आणि नित्या श्री यांनी मिश्र दुहेरी SH-6 प्रकारात कांस्यपदक पटकावले. उपांत्य फेरीत, ही भारतीय जोडी इंडोनेशियाच्या रीना मार्लिना आणि सुभान यांच्याकडून १४-२१, १८-२१ ने पराभूत झाली. दोन्ही गेम अटीतटीचे झाले, पण इंडोनेशियन जोडीने आपली आघाडी कायम ठेवत अंतिम फेरीत प्रवेश केला. पराभव होऊनही, कृष्णा आणि नित्या यांनी कांस्यपदक जिंकून भारताच्या पदकतालिकेत आणखी एका पदकाची भर घातली.

स्वाती चौधरीला रौप्यपदक

यापूर्वी, भारतीय तिरंदाज स्वाती चौधरीने महिलांच्या W-1 वैयक्तिक स्पर्धेत रौप्यपदक जिंकले. अंतिम सामन्यात चीनच्या मेंगकान सेनने तिला ६-४ ने पराभूत केले. स्वातीने सामन्यात ४-२ अशी आघाडी घेतली होती, पण चिनी तिरंदाजाने पुनरागमन करत सुवर्णपदक जिंकले.

---------------

हिंदुस्थान समाचार / वृषाली देशपांडे