दुबई, २८ ऑक्टोबर (हिं.स.)अभिषेक शर्माने न्यूझीलंडविरुद्ध शतक झळकावल्यानंतर आयसीसी टी-२० फलंदाजी क्रमवारीत पुन्हा अव्वल स्थान पटकावले आहे. दरम्यान, दक्षिण आफ्रिकेचा वेगवान गोलंदाज मार्को जॅनसेनने आपल्या कारकिर्दीत पहिल्यांदाच कसोटी गोलंदाजी आणि अष्टपैलू क्रमवारीत अव्वल स्थान पुन्हा मिळवले आहे.

अभिषेकने मंगळवारी वेलिंग्टन येथे न्यूझीलंडविरुद्धच्या तिसऱ्या टी-२० सामन्यात धमाकेदार खेळी केली. या डावखुऱ्या फलंदाजाने अवघ्या ३५ चेंडूंमध्ये आपले शतक पूर्ण केले आणि ३८ चेंडूंमध्ये ११३ धावा केल्या. त्याच्या या खेळीमुळे भारताला सहा गडी राखून विजय मिळवून मालिका जिंकण्यास मदत झाली.

या कामगिरीमुळे अभिषेकने आपला सहकारी इशान किशनला मागे टाकत अव्वल स्थान पटकावले. या वर्षी जुलैमध्ये आयर्लंडविरुद्धच्या शानदार कामगिरीनंतर इशानने अभिषेककडून अव्वल स्थान हिसकावून घेतले होते. अभिषेकने ऑस्ट्रेलियाच्या ट्रॅव्हिस हेडला मागे टाकत जुलै २०२५ मध्ये प्रथमच टी२० आंतरराष्ट्रीय फलंदाजांच्या क्रमवारीत अव्वल स्थान मिळवले होते.

गकेबरहा येथे झालेल्या दुसऱ्या जागतिक कसोटी चॅम्पियनशिप सामन्यात ऑस्ट्रेलियाविरुद्ध शानदार कामगिरी केल्यानंतर दक्षिण आफ्रिकेच्या मार्को यान्सनने कसोटी गोलंदाजी आणि अष्टपैलू खेळाडूंच्या क्रमवारीत पुन्हा अव्वल स्थान मिळवले आहे. दक्षिण आफ्रिकेच्या मोठ्या विजयात यान्सनने फलंदाजी करताना ८५ धावा केल्या आणि ऑस्ट्रेलियाच्या पहिल्या डावात महत्त्वपूर्ण पाच बळी घेतले.

या कामगिरीमुळे २६ वर्षीय यान्सनला कसोटी क्रमवारीच्या तिन्ही श्रेणींमध्ये फायदा झाला आहे. कसोटी फलंदाजांच्या यादीत तो १३ स्थानांनी पुढे जात ५६ व्या स्थानावर पोहोचला आहे. कसोटी गोलंदाजांच्या क्रमवारीत त्याने पाच स्थानांची झेप घेत ऑस्ट्रेलियाच्या मिचेल स्टार्कला मागे टाकले आहे. त्याने कसोटी अष्टपैलू क्रमवारीतही एक स्थान वर झेप घेतली असून, भारताच्या रवींद्र जडेजाला अव्वल स्थानावरून खाली खेचले आहे.

जडेजा चार वर्षांहून अधिक काळ कसोटी अष्टपैलू क्रमवारीत अव्वल स्थानावर होता. दक्षिण आफ्रिकेचा माजी महान गोलंदाज डेल स्टेनने यान्सनला जगातील सर्वोत्तम क्रिकेटपटू असे संबोधल्यानंतर लगेचच यान्सनने ही कामगिरी केली आहे.

भारताच्या संजू सॅमसनने टी-२० आंतरराष्ट्रीय क्रमवारीतही प्रगती केली आहे. फलंदाजीच्या यादीत तो सहा स्थानांनी वर चढून २० व्या स्थानावर पोहोचला आहे. न्यूझीलंडचा आक्रमक फलंदाज फिन ॲलन तीन स्थानांनी झेप घेऊन २५ व्या स्थानावर पोहोचला आहे.

न्यूझीलंडचा कर्णधार मिचेल सँटनर गोलंदाजांच्या टी-२० आंतरराष्ट्रीय क्रमवारीत सात स्थानांनी वर चढून सातव्या स्थानावर पोहोचला आहे. भारताचा अर्शदीप सिंगही सहा स्थानांनी पुढे गेला असून आता तो १५ व्या स्थानावर आहे.

---------------

हिंदुस्थान समाचार / वृषाली देशपांडे