वेलिंग्टन(न्यूझीलंड), 29 ऑक्टोबर (हिं.स.) न्यूझीलंडचे वेगवान गोलंदाज लॉकी फर्ग्युसन आणि मॅट हेन्री दुखापतींमुळे भारतविरुद्धच्या पाच सामन्यांच्या टी-२० मालिकेतील उर्वरित सामन्यांतून बाहेर झाले आहेत. क्राइस्टचर्च येथे झालेल्या दुसऱ्या टी-२० सामन्यादरम्यान फर्ग्युसनच्या पोटरीला दुखापत झाली असून, त्याला किमान एक आठवडा मैदानापासून दूर राहावे लागेल. त्याच सामन्यात हेन्रीच्या मांडीच्या स्नायूंना दुखापत झाली असून, त्याला पूर्णपणे बरे होण्यासाठी दोन आठवड्यांचा कालावधी लागेल.

न्यूझीलंड संघाने भारतविरुद्धच्या शेवटच्या दोन टी-२० सामन्यांसाठी वेगवान गोलंदाज मॅट फिशरला संघात समाविष्ट केले आहे. ४ नोव्हेंबरपासून सुरू होणाऱ्या एकदिवसीय मालिकेसाठी फर्ग्युसन आणि हेन्री तंदुरुस्त होतील, अशी आशा संघ व्यवस्थापनाला आहे. मालिकेतील चौथा टी-२० सामना शुक्रवारी, तर पाचवा आणि शेवटचा सामना रविवारी खेळवला जाईल.

न्यूझीलंडचे प्रशिक्षक रॉब वॉल्टर म्हणाले, लॉकी आणि मॅट यांच्यासाठी आम्हाला खूप वाईट वाटत आहे. आंतरराष्ट्रीय क्रिकेटमध्ये दुखापती या खेळाचाच एक भाग आहेत, परंतु जेव्हा खेळाडूंना सामने मुकावे लागतात, तेव्हा ते नक्कीच कठीण असते.सुदैवाने, मॅट आधीच उर्वरित टी-२० सामन्यांतून विश्रांती घेणार होता, कारण त्याच्यासमोर उन्हाळी हंगामातील महत्त्वाचे सामने आहेत. आम्हाला आशा आहे की तो एकदिवसीय मालिकेत महत्त्वाची भूमिका बजावेल.

मला माहीत आहे की, उद्या ईडन पार्कवर प्रेक्षकांनी पूर्ण भरलेल्या स्टेडियमसमोर खेळण्यासाठी लॉकी खूप उत्सुक होता, पण तो एकदिवसीय मालिकेसाठी पुन्हा संघात परतण्यास दृढनिश्चयी आहे, असे त्यांनी सांगितले.

न्यूझीलंडचा संघ:

मिचेल सँटनर (कर्णधार), फिन ॲलन, मायकेल ब्रेसवेल, मार्क चॅपमन, जोश क्लार्कसन, डेव्हन कॉनवे, जेकब डफी, मॅट फिशर, झॅक फोक्स, बेव्हॉन जेकब्स, ॲडम मिल्ने, डॅरिल मिचेल, ग्लेन फिलिप्स, टिम सायफर्ट, नॅथन स्मिथ, ब्लेअर टिकनर.

---------------

हिंदुस्थान समाचार / वृषाली देशपांडे