कक्कड यांनी सांगितले आप सोडण्याचे कारण
नवी दिल्ली, 03 ऑक्टोबर (हिं.स.)। आम आदमी पार्टीच्या माजी मुख्य राष्ट्रीय प्रवक्त्या प्रियंका कक्कड, पत्रकार रजत राकेश टंडन आणि उत्तर प्रदेशचे माजी आमदार श्याम सुंदर शर्मा शनिवारी काँग्रेसमध्ये दाखल झाले. काँग्रेसचे राज्यसभा खासदार राजीव शुक्ला, सय्यद नसीर हुसेन तसेच पक्षाच्या मीडिया विभागाचे अध्यक्ष आणि राज्यसभा खासदार पवन खेरा यांच्यासह अन्य नेत्यांच्या उपस्थितीत तिघांनीही पक्षाचे सदस्यत्व स्वीकारले.
येथे शनिवारी पक्षाच्या मुख्यालयात आयोजित कार्यक्रमात काँग्रेसमध्ये दाखल झालेले श्याम सुंदर शर्मा हे उत्तर प्रदेशात आठ वेळा आमदार आणि माजी मंत्री राहिले आहेत. तर रजत राकेश टंडन यांच्या कुटुंबाचे काँग्रेसशी जुने संबंध आहेत. त्यांनी दोन दशकांहून अधिक काळ पत्रकारिता केली आहे. प्रियंका कक्कड या आम आदमी पार्टीच्या माजी मुख्य राष्ट्रीय प्रवक्त्या असून सर्वोच्च न्यायालयाच्या वरिष्ठ अधिवक्त्या आहेत.
काँग्रेसमध्ये प्रवेश केल्यानंतर प्रियंका कक्कड यांनी सांगितले की, एखादा नेता आपल्या विचारांना पुढे नेण्यास घाबरत नसेल, तर ते राहुल गांधी आहेत. त्यांनी राहुल गांधी यांच्या मुख्य निवडणूक आयुक्त ज्ञानेश कुमार यांच्याबाबत सुरू असलेल्या अभियानाचा उल्लेख करताना सांगितले की, त्यांनी या मुद्द्यावर लोकांना जागरूक केले. कक्कड यांनी आम आदमी पार्टीतील आपल्या अनुभवांचा उल्लेख करत सांगितले की, एका काळी पक्षाने बंगला किंवा कार घेणार नसल्याचे सांगितले होते, मात्र नंतर खासगी प्रवासासाठी हेलिकॉप्टरचा वापर सुरू झाला. एका काळी आम आदमी पार्टीने मोठ्या संख्येने प्रतिभावान आणि समजदार लोकांना आकर्षित केले होते, मात्र नंतर त्यांना पक्षासोबत ठेवता आले नाही. आता अशा लोकांना राजस्थानातून आणून पंजाबमध्ये वरिष्ठ पदे दिली जात आहेत, ज्यांनी बूथ स्तरावरही काम केलेले नाही. अशा गोष्टींचा दीर्घकाळ बचाव करणे आपल्याला शक्य नव्हते, असे त्यांनी सांगितले.
श्याम सुंदर शर्मा यांनी सांगितले की, राजकारणाचा अर्थ परिश्रम, सार्वभौमत्व, प्रतिबद्धता आणि वचनबद्धता आहे आणि ही विचारसरणी काँग्रेसमध्ये आहे. इतर पक्ष जातिवाद आणि धर्मवादाची चर्चा करतात, तर काँग्रेस आणि राहुल गांधी मानवतावादाची चर्चा करतात.
रजत राकेश टंडन यांनी सांगितले की, त्यांच्या कुटुंबाचे काँग्रेसशी जुने संबंध आहेत आणि कुटुंबाची विचारसरणी काँग्रेससोबत राहिली आहे. पत्रकार म्हणून त्यांनी दीर्घकाळ काँग्रेसचे वार्तांकन केले आहे. यावेळी पक्षामध्ये लोकांचे म्हणणे ऐकून घेतले जाते, असे त्यांनी पाहिले.
राज्यसभा खासदार राजीव शुक्ला यांनी सांगितले की, श्याम सुंदर शर्मा हे उत्तर प्रदेशातील प्रभावशाली नेत्यांमध्ये राहिले असून ते आठ वेळा आमदार आणि माजी मंत्री राहिले आहेत. प्रियंका कक्कड आणि रजत राकेश टंडन यांच्या काँग्रेसमध्ये प्रवेशामुळे उत्तर प्रदेश तसेच देशाच्या राजकारणावर परिणाम होईल.
---------------
हिंदुस्थान समाचार / Suraj Chaugule
