लातूर, 03 ऑक्टोबर (हिं.स.)।

लातूर शहरातील नागरिकांचे हरवलेले मोबाईल फोन शोधून ते मूळ मालकांना परत करण्यात लातूर शहर पोलिसांना यश आले आहे. एमआयडीसी, शिवाजीनगर आणि विवेकानंद चौक पोलीस ठाण्यांच्या पथकांनी एकूण ५१ हरवलेले मोबाईल शोधून काढत संबंधित नागरिकांच्या स्वाधीन केले.

मोबाईल हरवल्यानंतर नागरिकांनी संबंधित पोलीस ठाण्यात तक्रारी दाखल केल्या होत्या. या तक्रारींच्या आधारे पोलिसांनी CEIR (Central Equipment Identity Register) पोर्टलचा प्रभावी वापर करत हरवलेल्या मोबाईलचा शोध घेण्यासाठी सातत्याने पाठपुरावा केला. तांत्रिक तपासाच्या माध्यमातून ५१ मोबाईल शोधण्यात पोलिसांना यश आले.

शोधण्यात आलेले मोबाईल संबंधित नागरिकांशी संपर्क साधून पोलीस ठाण्यात बोलावण्यात आले. पडताळणी केल्यानंतर हे मोबाईल त्यांच्या मूळ मालकांच्या स्वाधीन करण्यात आले. हरवलेला मोबाईल पुन्हा मिळाल्याने नागरिकांनी समाधान व्यक्त करत लातूर पोलिसांचे आभार मानले.

आजच्या डिजिटल युगात मोबाईल हा केवळ संपर्काचे साधन राहिले नसून बँकिंग, ऑनलाइन व्यवहार, शिक्षण, कार्यालयीन कामकाज आणि विविध शासकीय सेवांसाठी अत्यावश्यक साधन बनला आहे. त्यामुळे मोबाईल हरवल्यास नागरिकांना आर्थिक तसेच मानसिक त्रासाला सामोरे जावे लागते. अशा परिस्थितीत पोलिसांनी तंत्रज्ञानाचा वापर करून हरवलेले मोबाईल शोधून परत केल्याने नागरिकांना मोठा दिलासा मिळाला आहे.

या कारवाईत एमआयडीसी पोलीस ठाण्याने १९, शिवाजीनगर पोलीस ठाण्याने २१ आणि विवेकानंद चौक पोलीस ठाण्याने ११, असे एकूण ५१ मोबाईल फोन शोधून त्यांच्या मूळ मालकांना परत केले.

ही कारवाई शिवाजीनगर पोलीस ठाण्याचे पोलीस निरीक्षक पाटील, एमआयडीसी पोलीस ठाण्याचे पोलीस निरीक्षक चावरे आणि विवेकानंद चौक पोलीस ठाण्याचे पोलीस निरीक्षक पवार यांच्या मार्गदर्शनाखाली करण्यात आली.

हरवलेल्या वस्तूंबाबत नागरिकांच्या तक्रारींची दखल घेऊन आधुनिक तंत्रज्ञानाच्या माध्यमातून त्यांचा शोध घेण्यासाठी लातूर शहर पोलिसांकडून सातत्याने प्रयत्न केले जात आहेत. या कारवाईमुळे तक्रारीनंतर प्रभावी पाठपुरावा आणि तंत्रज्ञानाच्या मदतीने नागरिकांना दिलासा देण्याच्या पोलिसांच्या प्रयत्नांना बळ मिळाले आहे.

---------------

हिंदुस्थान समाचार / Mahesh Madanrao Chitnis