नवी दिल्ली, 31 ऑक्टोबर (हिं.स.)। दुचाकी वाहन निर्माती कंपनी हिरो मोटोकॉर्पने आपल्या डेस्टिनी ११० या स्कूटरचे नवे विशेष संस्करण बाजारात दाखल केले आहे. ‘क्लासिक एडिशन’ असे या नव्या स्कूटरचे नाव असून, त्याची सुरुवातीची किंमत ७६ हजार ४०० रुपये (एक्स-शोरूम) आहे. आकर्षक रंगसंगती, नवीन ग्राफिक्स आणि बाह्य सजावटीतील बदलांमुळे ही स्कूटर नेहमीच्या मॉडेलपेक्षा वेगळी ठरणार आहे.
दोन आकर्षक रंगांचे पर्याय
हिरो डेस्टिनी ११० क्लासिक एडिशन दोन रंगांच्या पर्यायांमध्ये उपलब्ध आहे. यामध्ये मॅट गोल्डफिश सिल्व्हर आणि लाइट इंडस्ट्रियल ग्रे या रंगसंगतीचा समावेश आहे. या पर्यायात स्कूटरच्या आतील पॅनेलला तपकिरी रंग देण्यात आला आहे. दुसरा पर्याय मॅट एरीज ब्राउन रंगात असून, त्यामध्ये आतील पॅनेल काळ्या रंगाचे आहेत. दोन्ही रंगांच्या स्कूटरच्या पुढील आणि बाजूच्या पॅनेलवर नवीन पट्ट्यांची सजावट करण्यात आली आहे. तसेच आरसे आणि आसनावरील आवरण रंगसंगतीशी जुळणारे ठेवण्यात आले आहे. याशिवाय त्रिमितीय क्लासिक एडिशन बॅज आणि रिम टेप देण्यात आले आहेत.
११० सीसी इंजिन, ५६.२ किलोमीटर मायलेज
या स्कूटरमध्ये ११० सीसी क्षमतेचे इंजिन देण्यात आले आहे. हे इंजिन ८.१ बीएचपी शक्ती आणि ८.८७ एनएम टॉर्क निर्माण करते. कंपनीच्या दाव्यानुसार, ही स्कूटर एका लिटर इंधनात ५६.२ किलोमीटर अंतर पार करू शकते. त्यामुळे दैनंदिन प्रवासासाठी ही स्कूटर उपयुक्त ठरू शकते.
आधुनिक सुविधांचा समावेश
हिरो डेस्टिनी ११० क्लासिक एडिशनमध्ये प्रोजेक्टर एलईडी हेडलाइट, एलईडी टेललॅम्प आणि डिजिटल-अॅनालॉग स्पीडोमीटर देण्यात आला आहे. याशिवाय पुढील बाजूस ग्लोव्हबॉक्स असून, त्यामध्ये यूएसबी चार्जिंग पोर्टची सुविधा उपलब्ध आहे. त्यामुळे प्रवासादरम्यान मोबाइल चार्ज करण्याची सोय मिळते.
आरामदायी प्रवासासाठी विशेष रचना
या स्कूटरचा व्हीलबेस १,३०२ मिमी, आसनाची उंची ७७० मिमी आणि जमिनीपासूनची उंची १६२ मिमी आहे. पुढील बाजूस टेलिस्कोपिक फोर्क, तर मागील बाजूस सिंगल-साइडेड शॉक अॅब्झॉर्बर देण्यात आले आहेत. स्कूटरमध्ये १२ इंचांची चाके आणि ट्यूबलेस टायर आहेत. पुढील टायरचा आकार ९०/९०, तर मागील टायरचा आकार १००/८० आहे. या स्कूटरचे वजन ११४ किलो असून, इंधन टाकीची क्षमता ५.३ लिटर आहे. आकर्षक रूप आणि आधुनिक सुविधांमुळे या नव्या संस्करणाकडे ग्राहकांचे लक्ष वेधले जाण्याची शक्यता आहे.
---------------
हिंदुस्थान समाचार / Suraj Chaugule
