ओटावा, 08 ऑक्टोबर (हिं.स.)।कॅनडाच्या लेखिका अॅनी कार्सन यांना २०२६ सालचा साहित्याचा नोबेल पुरस्कार जाहीर करण्यात आला आहे. स्वीडिश अकादमीने गुरुवारी या प्रतिष्ठित पुरस्काराची घोषणा करताना सांगितले की, अॅनी कार्सन यांच्या धाडसी आणि कल्पनाशील लेखनासाठी त्यांना हा सन्मान देण्यात आला आहे.

अकादमीच्या मते, कार्सन यांच्या लेखनाने शास्त्रीय परंपरांशी रंजक संवाद साधत समकालीन साहित्यासाठी नवे आयाम आणि नवे साहित्यिक रूप निर्माण केले आहेत.अॅनी कार्सन यांनी १९९०च्या दशकात अनेक गाजलेल्या साहित्यकृती लिहिल्या. त्यापैकी ‘ग्लास, आयरनी, अँड गॉड’ (१९९५) या पुस्तकातील ‘द ग्लास एसे’ ही रचना विशेष उल्लेखनीय आहे. नोबेल समितीच्या मते, त्यांच्या लेखनातील अनोखी शैली आणि नावीन्यपूर्ण विचारांसाठी त्यांना हा पुरस्कार देण्यात आला आहे.

नोबेल समितीने म्हटले आहे की, कार्सन यांच्या लेखनाचे सर्वात मोठे वैशिष्ट्य म्हणजे त्या जुन्या कथांचे केवळ पुनर्लेखन करत नाहीत, तर त्यामध्ये स्वतःची कल्पनाशक्ती आणि आधुनिक जीवनातील भावनांचीही सांगड घालतात. अनेकदा त्यांच्या साहित्यकृतींमध्ये कविता, कथा आणि निबंध यांच्यातील सीमारेषाही नाहीशा होतात. त्यामुळे त्यांची लेखनशैली इतर लेखकांपेक्षा वेगळी ठरते.

अॅनी कार्सन यांचा जन्म १९५० मध्ये कॅनडातील टोरोंटो येथे झाला. त्यांनी प्राचीन ग्रीक आणि रोमन साहित्याचा अभ्यास केला. १९८१ मध्ये त्यांनी ‘क्लासिक्स’ या जर्नलमध्ये ‘ओड एट अमो एर्गो सम’ या शीर्षकाची डॉक्टरेट प्रबंधिका प्रकाशित केली.

---------------

हिंदुस्थान समाचार / Priyanka Bansode