मुंबई, 08 ऑक्टोबर (हिं.स.) : भारतीय शेअर बाजारात सलग दुसऱ्या सत्रात घसरण नोंदवण्यात आली. सेन्सेक्स आणि निफ्टी या प्रमुख निर्देशांकांमध्ये लक्षणीय घसरण झाली. जागतिक बाँड उत्पन्नातील वाढ, रिझर्व्ह बँक ऑफ इंडियाच्या (आरबीआय) मौद्रिक धोरणाचा परिणाम आणि विदेशी गुंतवणूकदारांकडून सुरू असलेली विक्री यामुळे बाजारावर दबाव कायम राहिला.

जागतिक बाजारपेठांमध्ये बाँड यील्ड सातत्याने वाढत असल्याने शेअर बाजारांमध्येही नकारात्मक वातावरण निर्माण झाले आहे. त्याचा परिणाम भारतीय बाजारावरही दिसून आला. सेन्सेक्स आणि निफ्टी 50 हे दोन्ही निर्देशांक सुरुवातीला संमिश्र कलासह जवळपास स्थिर पातळीवर खुले झाले. मात्र, काही वेळातच बाजारावर विक्रीचा दबाव वाढला आणि दोन्ही निर्देशांक घसरणीकडे वळले.गुंतवणूकदार सध्या भारतीय रिझर्व्ह बँकेच्या ताज्या मौद्रिक धोरणाच्या परिणामांचा आढावा घेत आहेत.

त्याचवेळी जागतिक बाजारातील नकारात्मक संकेत आणि विदेशी गुंतवणूकदारांकडून सुरू असलेली सातत्यपूर्ण विक्री यामुळे बाजारातील गुंतवणूकदारांच्या भावनेवर परिणाम झाला आहे.दुपारी १ वाजता सेन्सेक्स ९०९.४५ अंकांनी म्हणजेच १.२५ टक्क्यांनी घसरून ७१,७२९.२६ अंकांवर होता. त्याचवेळी निफ्टी ५० मध्ये ३२३.१० अंकांची म्हणजेच १.४३ टक्क्यांची घसरण झाली असून तो २२,२७९.९५ अंकांवर व्यवहार करत होता. निफ्टीने दिवसभरात २२,२५४.३० अंकांची नीचांकी पातळी गाठली.

धातू, फार्मा आणि रिअल्टी क्षेत्रात मोठी घसरण

क्षेत्रनिहाय कामगिरी पाहता जवळपास सर्वच प्रमुख क्षेत्रांमध्ये विक्रीचा दबाव दिसून आला. निफ्टी ऑटोमध्ये १.७८ टक्के, एफएमसीजीमध्ये १.८१ टक्के, मीडिया क्षेत्रात १.७१ टक्के, मेटलमध्ये ३.२३ टक्के, फार्मामध्ये २.१३ टक्के, रिअल्टीमध्ये २.३९ टक्के, हेल्थकेअरमध्ये २.२१ टक्के आणि तेल-गॅस क्षेत्रात २.६० टक्क्यांची घसरण झाली. निफ्टी 500 हेल्थकेअर निर्देशांकातही २.२९ टक्क्यांची घट नोंदवण्यात आली.दरम्यान, सकाळच्या सत्रात धातू, कन्झ्युमर ड्युरेबल्स आणि रसायन क्षेत्रातील काही समभागांमध्ये किरकोळ मजबुती दिसून आली होती.

व्याजदरवाढीमुळे इक्विटीच्या मूल्यांकनावर दबाव

बाजार विश्लेषकांच्या मते, आरबीआयने स्वीकारलेल्या ‘कॅलिब्रेटेड टाइटनिंग’ भूमिकेमुळे आणि रेपो दरात २५ आधारभूत अंकांची वाढ केल्याने इक्विटी बाजारातील मूल्यांकनावर दबाव वाढला आहे. व्याजदर वाढल्यामुळे निश्चित उत्पन्न देणारी गुंतवणूक गुंतवणूकदारांसाठी तुलनेने अधिक आकर्षक ठरू शकते.तज्ज्ञांच्या मते, अशा परिस्थितीत गुंतवणूकदारांचा कल फार्मास्युटिकल्ससारख्या तुलनेने कमी व्याजदर-संवेदनशील क्षेत्रांकडे वाढू शकतो.

बाजारातील जाणकारांच्या मते, समभागांचे मूल्यांकन तुलनेने उच्च पातळीवर असतानाही ग्रोथ स्टॉक्समधील गुंतवणूकदारांची रुची कायम आहे. मात्र, व्हॅल्यू स्टॉक्सची कामगिरी सध्या तुलनेने कमजोर राहिली आहे.विश्लेषकांच्या मते, विदेशी पोर्टफोलिओ गुंतवणूकदारांकडून (FPI) सुरू असलेली सातत्यपूर्ण विक्री आणि अमेरिकेच्या १० वर्षांच्या ट्रेझरी बाँडवरील यील्ड ५.३ टक्क्यांपेक्षा अधिक पातळीवर कायम राहणे, यामुळे मोठ्या कंपन्यांच्या समभागांवर पुढील काळातही दबाव राहण्याची शक्यता आहे.

-----------------------

हिंदुस्थान समाचार / संदेश साळुंके (रायगड)