नवी दिल्ली, 09 ऑक्टोबर (हिं.स.)। पुरुषांच्या हिरो आशियाई चॅम्पियन्स ट्रॉफी पंजाब-२०२६ मधील सामन्यांचे वेळापत्रक शुक्रवारी आशियाई हॉकी महासंघाने जाहीर केले. लीग टप्प्यातील सामने २७ ऑक्टोबर ते २ नोव्हेंबरदरम्यान जालंधर येथे खेळवले जातील, तर उपांत्य फेरी आणि पदकांसाठीचे सामने ४ आणि ५ नोव्हेंबर रोजी मोहाली येथे होतील. या स्पर्धेतील सामने जालंधर येथील ऑलिम्पियन सुरजीत सिंग हॉकी स्टेडियम आणि मोहाली येथील ऑलिम्पियन बलबीर सिंग सीनियर आंतरराष्ट्रीय हॉकी स्टेडियममध्ये खेळवले जातील. स्पर्धेचा उद्घाटन सोहळा २७ ऑक्टोबर रोजी होईल. त्यानंतर लगेचच भारत आपल्या मोहिमेची सुरुवात बांगलादेशविरुद्धच्या सामन्याने करेल.

भारताचे सर्व लीग सामने सायंकाळी सात वाजता

या स्पर्धेत भारत, मलेशिया, जपान, दक्षिण कोरिया, चीन आणि बांगलादेश या सहा संघांचा सहभाग असेल. लीग टप्प्यात प्रत्येक संघ अन्य सर्व संघांविरुद्ध खेळेल. प्रत्येक संघाचे पाच सामने होतील. गुणतालिकेतील पहिल्या चार संघांना उपांत्य फेरीत प्रवेश मिळेल. भारताचे सर्व लीग सामने भारतीय वेळेनुसार सायंकाळी सात वाजता सुरू होतील. भारतीय संघ २७ ऑक्टोबर रोजी बांगलादेश, २९ ऑक्टोबर रोजी चीन, ३० ऑक्टोबर रोजी जपान, १ नोव्हेंबर रोजी मलेशिया आणि २ नोव्हेंबर रोजी दक्षिण कोरियाविरुद्ध खेळेल. स्पर्धेत २८ ऑक्टोबर, ३१ ऑक्टोबर आणि ३ नोव्हेंबर हे विश्रांतीचे दिवस असतील. उपांत्य फेरीचे सामने ४ नोव्हेंबर रोजी, तर कांस्यपदक आणि सुवर्णपदकासाठीचे सामने ५ नोव्हेंबर रोजी खेळवले जातील.

विजेतेपद राखण्यासाठी भारत मैदानात उतरणार

भारत हा या स्पर्धेतील सर्वाधिक यशस्वी संघ आहे. भारतीय संघाने २०११, २०१६, २०१८ (पाकिस्तानसोबत संयुक्त विजेता), २०२३ आणि २०२४ या वर्षांत विजेतेपद पटकावले आहे. पाच वेळा विजेतेपद मिळवणारा भारतीय संघ नुकताच जपानमध्ये झालेल्या आशियाई क्रीडा स्पर्धेत सलग दुसऱ्यांदा सुवर्णपदक जिंकून परतला आहे. या स्पर्धेत सर्वोच्च मानांकन असलेला संघ म्हणून भारत मैदानात उतरेल. मायदेशातील प्रेक्षकांसमोर आणखी एक विजेतेपद मिळवण्याचा भारतीय संघाचा प्रयत्न असेल. पंजाबला भारतीय हॉकीची नर्सरी मानले जाते. या राज्याने देशाला अनेक दिग्गज हॉकीपटू दिले आहेत. त्यामुळे पंजाबमध्ये आंतरराष्ट्रीय हॉकीचे पुनरागमन होत असल्याने स्थानिक चाहत्यांना उच्च दर्जाचे सामने पाहण्याची संधी मिळणार आहे.

हॉकी इंडियाने व्यक्त केला उत्साह

हॉकी इंडियाचे अध्यक्ष डॉ. दिलीप टिर्की म्हणाले, “सामन्यांचे वेळापत्रक जाहीर झाल्यामुळे हिरो आशियाई चॅम्पियन्स ट्रॉफी पंजाब-२०२६ बद्दलचा उत्साह आणखी वाढला आहे. आशियातील विविध संघांचे पंजाबमध्ये स्वागत करताना आम्हाला आनंद होत आहे. उच्च दर्जाचे हॉकी सामने पाहण्यासाठी आम्ही उत्सुक आहोत.”

हॉकी इंडियाचे महासचिव भोला नाथ सिंह म्हणाले, “वेळापत्रक जाहीर झाल्यामुळे स्पर्धेची उलटगणती सुरू झाली आहे. सहभागी देशांचे यजमानपद भूषवण्याचा आणि पंजाबमधील हॉकीप्रेम व आदरातिथ्य जगासमोर आणण्याचा हॉकी इंडियाला अभिमान आहे. ही स्पर्धा रोमांचक आणि चुरशीची होईल, अशी आम्हाला अपेक्षा आहे. या स्पर्धेमुळे चाहत्यांना खेळाशी अधिक जवळीक साधता येईल आणि प्रत्येक संघाला सर्वोच्च स्तरावर कामगिरी करण्याची संधी मिळेल.”

---------------

हिंदुस्थान समाचार / Suraj Chaugule