ओमान, 10 नोव्हेंबर (हिं.स.) एसीसी पुरुष अंडर-१९ आशिया कपच्या 'अ' गटातील सामन्यात, आर्यवीर सेहवागच्या शानदार शतकाच्या जोरावर भारताने संयुक्त अरब अमिराती (युएई) संघाचा ७० धावांनी पराभव केला. सेहवागच्या दमदार शतकामुळे भारताने युएईसमोर ३१० धावांचे लक्ष्य ठेवले. प्रत्युत्तरात, युएईचा संघ केवळ २३९ धावांवर सर्वबाद झाला आणि त्यांनी हा सामना गमावला.

युएईने नाणेफेक जिंकून प्रथम गोलंदाजी करण्याचा निर्णय घेतला, जो त्यांना महागात पडला. सेहवागने १६८ चेंडूंमध्ये १७ चौकार आणि सात षटकारांसह १६० धावा केल्या.दरम्यान, व्ही. के. विनीतने ६९ चेंडूंमध्ये तीन चौकार आणि तितक्याच षटकारांसह ६७ धावा केल्या, ज्यामुळे भारतीय संघाने ५० षटकांत सात गडी गमावून ३०९ धावा केल्या.

लक्ष्याचा पाठलाग करताना, युएई संघाकडून अहमद खुदाददने ७४ चेंडूंमध्ये ७४ धावा करत शानदार अर्धशतक झळकावले. परंतु तो आपल्या संघाला विजय मिळवून देण्यात अपयशी ठरला. या विजयामुळे भारताने उपांत्य फेरीत आपले स्थान निश्चित केले असून, तिथे त्यांचा सामना अफगाणिस्तानशी होईल.

प्रथम फलंदाजी करताना भारतीय संघाने शानदार सुरुवात केली. सेहवाग आणि कर्णधार लक्ष्य रायचंदानी यांनी पहिल्या विकेटसाठी ६२ धावा जोडल्या. मात्र, लक्ष्य केवळ १७ धावा करून पॅव्हेलियनमध्ये परतला.

यानंतर व्ही. के. विनीत आणि सेहवाग यांच्यात १९३ धावांची ऐतिहासिक भागीदारी झाली. या दोघांच्या उत्कृष्ट भागीदारीमुळे भारताने ५० षटकांत ३०० धावांचा टप्पा ओलांडला. या डावात सेहवागने शानदार शतक झळकावले आणि विनीतने अर्धशतक झळकावले. युएईकडून नसीम खानने सर्वाधिक चार बळी घेतले.

भारताने ठेवलेल्या लक्ष्याचा पाठलाग करताना, युएईच्या विकेट्स नियमित अंतराने पडत होत्या. १४१ धावांत त्यांच्या सहा विकेट्स पडल्या होत्या. त्यानंतर अहमद खुदादद आणि नूरुल्ला अयुबी यांनी ५२ चेंडूंमध्ये ९० धावांची भागीदारी केली.

मात्र, ही भागीदारी संघाला विजय मिळवून देण्यासाठी पुरेशी ठरली नाही. युएईचा संघ ५० षटकांत २३९ धावांवर सर्वबाद झाला. सर्व सात भारतीय गोलंदाजांनी विकेट्स घेतल्या, ज्यात इशान सूदने सर्वाधिक चार विकेट्स घेतल्या. उर्वरित सहा गोलंदाजांनी प्रत्येकी एक विकेट घेतली. या विजयासह भारताने उपांत्य फेरीत प्रवेश केला.

---------------

हिंदुस्थान समाचार / वृषाली देशपांडे