भारतीय उत्पादनांसाठी अमेरिकेचे दरवाजे अधिक खुले, व्यापारात मिळणार विशेष सवलत- पीयूष गोयल
नवी दिल्ली, 15 नोव्हेंबर (हिं.स.)।केंद्रीय वाणिज्य आणि उद्योगमंत्री पीयूष गोयल यांनी रविवारी सांगितले की, भारताने अमेरिकेसोबत एक करार केला आहे. या करारामुळे भारतीय वस्तूंना अमेरिकेच्या बाजारपेठेत विशेष प्रवेश मिळणार आहे. तसेच, भारताला स्पर्धक देशां
भारतीय उत्पादनांसाठी अमेरिकेचे दरवाजे अधिक खुले, व्यापारात मिळणार विशेष सवलत- पीयूष गोयल


नवी दिल्ली, 15 नोव्हेंबर (हिं.स.)।केंद्रीय वाणिज्य आणि उद्योगमंत्री पीयूष गोयल यांनी रविवारी सांगितले की, भारताने अमेरिकेसोबत एक करार केला आहे. या करारामुळे भारतीय वस्तूंना अमेरिकेच्या बाजारपेठेत विशेष प्रवेश मिळणार आहे. तसेच, भारताला स्पर्धक देशांच्या तुलनेत कमी आयात शुल्काचा लाभ मिळणार आहे.

पीयूष गोयल यांनी दिलेल्या माहितीनुसार, पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांच्यात द्विपक्षीय व्यापार कराराच्या (बीटीए) आराखड्याची घोषणा झाली, त्याचवेळी याबाबत सहमती झाली होती. सध्या या कराराच्या पहिल्या टप्प्याला अंतिम स्वरूप देण्यासाठी दोन्ही देशांमध्ये चर्चा सुरू आहे.

दोन दिवसांच्या इजिप्त दौऱ्यावर असताना कैरो येथे पत्रकारांशी बोलताना गोयल म्हणाले, राष्ट्राध्यक्ष डोनाल्ड ट्रम्प आणि पंतप्रधान नरेंद्र मोदी यांच्यात यापूर्वीच याबाबत सहमती झाली आहे. काही महिन्यांपूर्वी दोन्ही नेत्यांनी व्यापार कराराच्या आराखड्याची घोषणा केली होती. त्यावेळी भारताला अमेरिकेच्या बाजारपेठेत विशेष व्यापार प्रवेश मिळेल आणि स्पर्धक देशांच्या तुलनेत भारतावर कमी आयात शुल्क आकारले जाईल, असे निश्चित करण्यात आले होते.

भारत आणि अमेरिकेने फेब्रुवारी महिन्यात द्विपक्षीय व्यापार कराराच्या पहिल्या टप्प्यासाठीच्या आराखड्याला अंतिम स्वरूप दिले होते. या करारावर यापूर्वीच स्वाक्षऱ्या होणे अपेक्षित होते. मात्र, अमेरिकेच्या आयात शुल्क धोरणात झालेल्या बदलांमुळे दोन्ही देशांना पुन्हा चर्चा करावी लागली. अलीकडेच एका अधिकाऱ्याने सांगितले होते की, प्रस्तावित करारांतर्गत भारतीय वस्तूंना आयात शुल्काच्या बाबतीत इतर देशांच्या तुलनेत अधिक फायदेशीर सवलती मिळतील, असे आश्वासन वॉशिंग्टनने नवी दिल्लीला दिले आहे.

चालू आर्थिक वर्षाच्या अखेरपर्यंत या कराराचा पहिला टप्पा पूर्ण करण्यासाठी दोन्ही देश प्रयत्नशील आहेत. गेल्या आठवड्यात एका अधिकाऱ्याने सांगितले, आयात शुल्काची रचना कशा प्रकारे निश्चित होते, हे पाहावे लागेल. चालू आर्थिक वर्षाच्या अखेरपर्यंत कराराचा पहिला टप्पा पूर्ण करण्याच्या दिशेने आम्ही काम करत आहोत. पहिल्या टप्प्यासह संपूर्ण द्विपक्षीय व्यापार कराराबाबतही चर्चा सुरू आहे.दरम्यान, अमेरिकेच्या व्यापार धोरणात झालेल्या बदलांचाही या चर्चेवर परिणाम झाला आहे. अमेरिकेच्या सर्वोच्च न्यायालयाने राष्ट्राध्यक्ष डोनाल्ड ट्रम्प यांनी लागू केलेले परस्पर आयात शुल्क रद्द केल्यानंतर ही परिस्थिती निर्माण झाली आहे.

---------------

हिंदुस्थान समाचार / Priyanka Bansode


 rajesh pande