
रायगड, 17 नोव्हेंबर (हिं.स.)। रायगड जिल्हाधिकारी कार्यालयाच्या स्तरावर ठेवण्यात येणाऱ्या गट-क व गट-ड संवर्गातील सामायिक अनुकंपा प्रतीक्षा यादी प्रसिद्ध करण्यात आली आहे. या यादीतील उमेदवारांची नावे आणि क्रमांकाबाबत काही हरकत किंवा आक्षेप असल्यास संबंधितांना ते नोंदविण्याची संधी देण्यात आली आहे.
सदर प्रतीक्षा यादी जिल्हाधिकारी कार्यालयाच्या नोटीस बोर्डवर, संबंधित नियुक्ती प्राधिकाऱ्यांच्या कार्यालयात तसेच रायगड जिल्ह्याच्या अधिकृत www.raigad.gov.in या संकेतस्थळावर उपलब्ध करून देण्यात आली आहे. त्यामुळे उमेदवारांना प्रत्यक्ष कार्यालयात जाण्यासह संकेतस्थळावरूनही यादी तपासता येणार आहे.
यादीतील नाव, क्रमांक किंवा अन्य नोंदींबाबत काही त्रुटी अथवा आक्षेप असल्यास संबंधित उमेदवारांनी आपले हरकत अर्ज आवश्यक तपशिलासह संबंधित नियुक्ती प्राधिकाऱ्यांमार्फत जिल्हाधिकारी कार्यालयाकडे ३० नोव्हेंबर २०२६ पर्यंत सादर करावेत, असे प्रशासनाने कळविले आहे. विहित मुदतीनंतर प्राप्त होणाऱ्या हरकतींचा विचार केला जाणार नसल्याचेही स्पष्ट करण्यात आले आहे.
ही माहिती निवासी उपजिल्हाधिकारी संदेश शिर्के यांनी दिली असून, संबंधित उमेदवारांनी प्रतीक्षा यादीची काळजीपूर्वक पडताळणी करून काही त्रुटी आढळल्यास निर्धारित प्रक्रियेनुसार वेळेत हरकत नोंदवावी, असे आवाहन प्रशासनाने केले आहे.
---------------
हिंदुस्थान समाचार / संदेश साळुंके (रायगड)