
मनिला, 21 नोव्हेंबर (हिं.स.)। एअर न्यू गिनीच्या प्रवासी विमानाच्या इंजिनमध्ये आगीची ठिणगी दिसल्याने मोठी खळबळ उडाली. विमानातील १४६ प्रवाशांचा आणि कर्मचाऱ्यांचा जीव धोक्यात आला होता. मात्र, वैमानिकांनी प्रसंगावधान राखत विमानाचे सुरक्षित आपत्कालीन लँडिंग केले. त्यामुळे संभाव्य मोठी दुर्घटना टळली असून सर्व प्रवाशांनी सुटकेचा निःश्वास सोडला. मध्यरात्रीनंतर दक्षिण फिलिपिन्समधील दावाओ आंतरराष्ट्रीय विमानतळावर ही घटना घडली.
मिळालेल्या माहितीनुसार, एअर न्यू गिनीचे बोईंग ७६७-३८३ ईआर हे विमान हाँगकाँगहून पापुआ न्यू गिनीकडे जात होते. विमानात १३७ प्रवासी आणि नऊ कर्मचारी असे एकूण १४६ जण प्रवास करत होते. प्रवासादरम्यान विमानाच्या उजव्या बाजूच्या इंजिनमध्ये संभाव्य आग किंवा ठिणगी असल्याचा इशारा वैमानिकांना यंत्रणेवरील संकेताद्वारे मिळाला. त्यामुळे विमानातील सर्वांच्या सुरक्षिततेचा प्रश्न निर्माण झाला.
इंजिनमध्ये आग लागण्याची शक्यता लक्षात येताच वैमानिकांनी तातडीने सुरक्षेच्या उपाययोजना सुरू केल्या. विमान नियोजित मार्गापासून भरकटल्याचे फिलिपिन्सच्या नागरी विमान वाहतूक प्राधिकरणाने स्पष्ट केले. त्यानंतर वैमानिकांनी दावाओ आंतरराष्ट्रीय विमानतळावर आपत्कालीन लँडिंग करण्याची परवानगी मागितली. मध्यरात्रीनंतर काही वेळातच विमानाचे सुरक्षितरीत्या लँडिंग करण्यात आले.
विमान जमिनीवर उतरल्यानंतर आपत्कालीन बाहेर पडण्याच्या घसरगुंडीचा वापर करून सर्व १३७ प्रवासी आणि नऊ कर्मचाऱ्यांना बाहेर काढण्यात आले. या संपूर्ण प्रक्रियेत कोणालाही दुखापत झाल्याची माहिती समोर आलेली नाही. विमानाचेही कोणतेही मोठे नुकसान झाल्याचे वृत्त नाही. त्यानंतर सर्व प्रवाशांना विमानतळाच्या इमारतीत नेण्यात आले. त्यांच्या राहण्याची व्यवस्था जवळच्या हॉटेलमध्ये करण्यात आली.
फिलिपिन्सच्या नागरी विमान वाहतूक प्राधिकरणाचे प्रवक्ते एरिक अपोलोनियो यांनी दिलेल्या माहितीनुसार, वैमानिकांनी निर्धारित सुरक्षेच्या नियमांचे पालन करत आपत्कालीन लँडिंगची विनंती केली होती. या घटनेच्या चौकशीत वैमानिकांनी दिलेली माहिती आणि विमानातील तांत्रिक यंत्रणेचे संकेत यांचाही समावेश केला जाणार आहे.
दरम्यान, आपत्कालीन परिस्थिती हाताळण्यासाठी दावाओ विमानतळ काही काळ इतर विमानांच्या वाहतुकीसाठी बंद ठेवण्यात आले होते. त्यामुळे विमानतळावर येणारी दोन देशांतर्गत उड्डाणे रद्द करावी लागली. मुख्य धावपट्टीची सुरक्षा तपासणी पूर्ण झाल्यानंतर विमानतळ पुन्हा सुरू करण्यात आले. वैमानिकांच्या सतर्कतेमुळे आणि वेळीच घेतलेल्या निर्णयामुळे १४६ जणांचे प्राण वाचले आणि मोठी विमान दुर्घटना टळली.
---------------
हिंदुस्थान समाचार / Suraj Chaugule