गुंतवणूकदारांच्या संपत्तीत ७.१५ लाख कोटींची भर

मुंबई, 05 नोव्हेंबर (हिं.स.) : भारतीय शेअर बाजारात आज, गुरुवारी तेजीचा ऐतिहासिक उत्साह पाहायला मिळाला. देशांतर्गत बाजारात झालेल्या जोरदार खरेदीच्या जोरावर मुंबई शेअर बाजाराचा सेन्सेक्स आणि राष्ट्रीय शेअर बाजाराचा निफ्टी या दोन्ही प्रमुख निर्देशांकांनी मोठी झेप घेतली. सेन्सेक्स तब्बल २,००८.६१ अंकांनी वधारून ७९,३१०.०१ अंकांवर, तर निफ्टी ५७६ अंकांची वाढ नोंदवत २४,५३६.६० अंकांवर बंद झाला. या तेजीमुळे गुंतवणूकदारांच्या संपत्तीत एका दिवसात तब्बल ७.१५ लाख कोटी रुपयांची भर पडली.

व्यवहाराच्या सुरुवातीपासूनच बाजारात खरेदीचा जोर कायम होता. वाहन उद्योग, बँकिंग, वित्तीय सेवा आणि माहिती तंत्रज्ञान क्षेत्रातील कंपन्यांच्या शेअर्सना गुंतवणूकदारांकडून मोठी मागणी मिळाली. परिणामी, दिवसभर बाजारात तेजीचे वातावरण राहिले आणि दोन्ही प्रमुख निर्देशांकांनी दमदार कामगिरी केली.क्षेत्रीय निर्देशांकांचा विचार करता ऑटोमोबाइल क्षेत्राने आघाडी घेतली. निफ्टी ऑटो निर्देशांकात ४.१४ टक्क्यांची वाढ झाली. त्यापाठोपाठ निफ्टी फायनान्शियल सर्व्हिसेस निर्देशांक ४.०१ टक्क्यांनी वधारला.

सार्वजनिक क्षेत्रातील बँकांच्या शेअर्समध्येही मोठी खरेदी झाल्याने निफ्टी पीएसयू बँक निर्देशांक ३.१२ टक्क्यांनी वाढून बंद झाला. माहिती तंत्रज्ञान क्षेत्रातील शेअर्सनाही चांगला प्रतिसाद मिळाला. निफ्टी आयटी निर्देशांकात २.४२ टक्क्यांची वाढ नोंदवण्यात आली.दरम्यान, फार्मा निर्देशांक १.०१ टक्के, मेटल निर्देशांक ०.८६ टक्के आणि एफएमसीजी निर्देशांक ०.४५ टक्क्यांनी वधारले. मात्र, बाजारातील एकूण तेजीला अपवाद ठरलेल्या मीडिया क्षेत्रात नफावसुलीचा दबाव दिसून आला. निफ्टी मीडिया निर्देशांक ०.९९ टक्क्यांनी घसरून बंद झाला. घसरण नोंदवणारा हा एकमेव क्षेत्रीय निर्देशांक ठरला.

मिडकॅप आणि स्मॉलकॅप शेअर्समध्येही खरेदी

मोठ्या कंपन्यांसोबतच मध्यम आणि लहान कंपन्यांच्या शेअर्समध्येही तेजीचे वातावरण होते. निफ्टी मिडस्मॉलकॅप ४०० ५०:५० निर्देशांकात १.३२ टक्क्यांची वाढ झाली, तर निफ्टी स्मॉलकॅप ५०० निर्देशांक ०.८२ टक्क्यांनी वधारला. त्यामुळे बाजारातील तेजीचा फायदा विविध श्रेणीतील कंपन्यांच्या शेअर्सना झाल्याचे स्पष्ट झाले.

गुंतवणूकदारांच्या संपत्तीत ७.१५ लाख कोटींची वाढ

या तेजीचा सर्वाधिक फायदा गुंतवणूकदारांना झाला. ४ नोव्हेंबर रोजी बीएसईवर सूचीबद्ध कंपन्यांचे एकूण बाजार भांडवल ४,९४,४२,१४०.६२ कोटी रुपये होते. गुरुवारच्या व्यवहारानंतर ते वाढून ५,०१,५७,३७९.२८ कोटी रुपयांवर पोहोचले. म्हणजेच एकाच दिवसात बाजार भांडवलात ७,१५,२३८.६६ कोटी रुपयांची वाढ झाली.

बजाज फायनान्स, इंडिगो आणि आयसीआयसीआय बँकेचे शेअर्स चमकले

सेन्सेक्समधील ३० कंपन्यांपैकी २४ कंपन्यांचे शेअर्स वाढीसह बंद झाले. बजाज फायनान्स, इंडिगो आणि आयसीआयसीआय बँकेच्या शेअर्समध्ये सर्वाधिक वाढ नोंदवण्यात आली. दुसरीकडे, एनटीपीसी आणि बीईएलच्या शेअर्समध्ये घसरण झाली.एकूणच, वाहन, बँकिंग आणि वित्तीय क्षेत्रातील जोरदार खरेदीसह मिडकॅप आणि स्मॉलकॅप शेअर्समधील सकारात्मक वातावरणामुळे भारतीय शेअर बाजाराने गुरुवारी दमदार कामगिरी केली. या तेजीमुळे गुंतवणूकदारांच्या संपत्तीत मोठी भर पडली आणि बाजारात उत्साहाचे वातावरण निर्माण झाले.

------------------------

हिंदुस्थान समाचार / मनीष कुलकर्णी