* केमिकल सोडून 'आयटी व ॲग्री' क्षेत्रात मारली बाजी

अहमदाबाद, ५ नोव्हेंबर (हिं.स.) : कृषी आणि माहिती तंत्रज्ञान क्षेत्रात कार्यरत असणाऱ्या 'वेलोरा इम्पॅक्ट लिमिटेड'या कंपनीने चालू आर्थिक वर्षाच्या पहिल्या सहामाहीचे आणि दुसऱ्या तिमाहीचे अलेखापरीक्षित निकाल जाहीर केले आहेत. 1 जानेवारी 2026 पासून व्यवसायात केलेल्या ऐतिहासिक बदलानंतर कंपनीच्या आर्थिक कामगिरीत प्रचंड वाढ झाली आहे. चालू आर्थिक वर्षाच्या पहिल्या सहामाहीत कंपनीचा निव्वळ नफा तब्बल 3 पटीने वाढून 12.63 कोटी रुपयांवर पोहोचला आहे, जो मागील वर्षी याच कालावधीत 4.49 कोटी रुपये होता.

महसुलात 86 पटींपेक्षा जास्त प्रचंड वाढ!

कंपनीच्या ऑपरेशन्समधून मिळणाऱ्या महसुलाने सर्वांचे लक्ष वेधून घेतले आहे.

पहिल्या सहामाहीचा महसूल: मागील वर्षी याच कालावधीत 3.33 कोटी रुपये असलेला महसूल चालू वर्षात थेट 290.56 कोटी रुपयांवर पोहोचला आहे.

दुसऱ्या तिमाहीचा महसूल: Q2 FY26 मधील 2.17 कोटी रुपयांच्या तुलनेत यंदा दुसऱ्या तिमाहीत महसूल 148.64 कोटी रुपये झाला आहे.

ईबीआयटीडीए (EBITDA): H1 FY27 मध्ये कंपनीने 16.91 कोटी रुपयांचा ईबीआयटीडीए नोंदवला आहे. तर Q2 FY27 मध्ये ईबीआयटीडीए 36.1 टक्क्याने वाढून 8.92 कोटी रुपयांवर पोहोचला आहे.

प्रति शेअर कमाई (EPS): कंपनीचा ईपीएस मागील वर्षीच्या 8.05 रुपयांवरून वाढून 22.67 रुपयांवर पोहोचला आहे.

वेलोरा इम्पॅक्ट लिमिटेड (पूर्वीची 'प्रतीक्षा केमिकल्स लिमिटेड') ही कंपनी 1 जानेवारी 2026 पूर्वी केमिकल उत्पादन आणि व्यापारात कार्यरत होती. परंतु, कंपनीने आपला मूळ व्यवसाय बदलून कृषी आणि माहिती तंत्रज्ञान या दोन नव्या क्षेत्रांत प्रवेश केला. या रणनीतिक बदलाचा जबरदस्त फायदा कंपनीला झाला आहे.

कृषी व्यापार: पहिल्या सहामाहीतील 290.56 कोटी रुपयांच्या एकूण महसुलापैकी 279.42 कोटी रुपयांचा वाटा एकट्या कृषी उत्पादनांच्या खरेदी-विक्री आणि पुरवठ्यातून आला आहे. यात धान्य, डाळी आणि ताज्या भाज्यांच्या पुरवठ्याचा समावेश आहे.

आयटी सेवा: आयटी विभागाने पहिल्या सहामाहीत 11.14 कोटी रुपयांचा महसूल मिळवला आहे. याअंतर्गत कंपनी सॉफ्टवेअर डेव्हलपमेंट, ईआरपी सोल्यूशन्स, डिजिटल ट्रान्सफॉर्मेशन आणि आयटी पायाभूत सुविधा पुरवण्याचे काम करते.

व्यवस्थापनाचा विश्वास आणि भविष्यातील योजना

केमिकल क्षेत्रातून बाहेर पडून कृषी आणि आयटी क्षेत्रात प्रवेश करणे हा वेलोरा इम्पॅक्टच्या विकासातील अत्यंत महत्त्वाचा टप्पा होता. आम्ही दोन्ही क्षेत्रांतील बाजाराच्या गरजा ओळखून स्पष्ट ध्येयाने पाऊल ठेवले. सुरुवातीच्या टप्प्यात मिळालेला हा उत्तम आर्थिक प्रतिसाद आमच्या व्यवसायाची पकड सिद्ध करतो. पुढेही ग्राहकांचे नेटवर्क वाढवून भागधारकांसाठी दीर्घकालीन मूल्य निर्माण करण्यावर आमचा भर असेल, अशी माहिती वेलोरा इम्पॅक्ट लिमिटेडचे व्यवस्थापकीय संचालक सुमित हरजीभाई गोल यांनी दिली आहे.

---------------

हिंदुस्थान समाचार / सुधांशू जोशी