अंतिम फेरीत चीनच्या झांग यी शिनकडून पराभव

डाकार (सेनेगल), 06 नोव्हेंबर (हिं.स.)। भारताची तन्वी पत्री हिला युवा ऑलिम्पिक स्पर्धा २०२६ मधील बॅडमिंटन महिला एकेरीच्या अंतिम फेरीत गुरुवारी रौप्यपदकावर समाधान मानावे लागले. विजेतेपदाच्या लढतीत तिला चीनची विद्यमान जागतिक ज्युनियर विजेती झांग यी शिन हिच्याकडून पराभव स्वीकारावा लागला.

तन्वीला पहिल्या गेममध्ये सुरुवातीला लय मिळवण्यासाठी थोडा वेळ लागला. मात्र, त्यानंतर तिने सलग सात गुण मिळवत ३-५ अशा पिछाडीवरून १०-५ अशी आघाडी घेतली. तिच्या उंच फटक्यांमुळे आणि नेटवरील उत्कृष्ट नियंत्रणामुळे झांगवर दबाव निर्माण झाला. भारतीय खेळाडूने २५ मिनिटांत पहिला गेम जिंकला. दुसऱ्या गेममध्ये तन्वीने ४-० अशा आघाडीसह दमदार सुरुवात केली. मात्र, कोर्टच्या मागील बाजूने येणाऱ्या वाऱ्याच्या दिशेमुळे तिच्या लांब फटक्यांवरील नियंत्रण प्रभावित झाले. मध्यंतरानंतर झांगने सामन्यावर पकड मजबूत केली आणि दुसरा गेम जिंकत सामना निर्णायक गेममध्ये नेला.

निर्णायक गेममध्ये झांगने कोर्टच्या एका कोपऱ्यातून दुसऱ्या कोपऱ्यात मारलेल्या ड्रॉप शॉट्सच्या जोरावर सुरुवातीपासूनच आघाडी घेतली. तिने गुणसंख्या १९-१० पर्यंत नेली. मात्र, तन्वीने हार न मानता सलग गुण मिळवत ही आघाडी १९-१५ अशी कमी केली. त्यानंतर तन्वीचा एक क्रॉस-कोर्ट स्मॅश मैदानाबाहेर गेल्याने झांगला सामन्यातील पाच मॅच पॉइंट मिळाले. तन्वीने उत्कृष्ट संघर्ष करत झांगचे पाचही मॅच पॉइंट वाचवले. तसेच सुवर्णपदक जिंकण्यासाठी तिला तीन संधीही मिळाल्या. मात्र, झांगच्या अधिक अनुभवामुळे अखेर निर्णायक भूमिका बजावली आणि तिने विजेतेपदावर नाव कोरले.

या रौप्यपदकासह तन्वी युवा ऑलिम्पिकमध्ये बॅडमिंटनमध्ये पदक जिंकणारी पहिली भारतीय महिला खेळाडू ठरली आहे. यापूर्वी तिने उपांत्य फेरीत जपानच्या युजुनो वातानाबे हिचा २१-१४, ११-२१, २१-१९ असा पराभव करून अंतिम फेरीत प्रवेश केला होता. वातानाबेने कांस्यपदक जिंकले. तन्वीच्या या रौप्यपदकामुळे युवा ऑलिम्पिकमधील भारताच्या बॅडमिंटन पदकांच्या यादीत आणखी एका पदकाची भर पडली आहे. यापूर्वी एच. एस. प्रणयने २०१० मध्ये, तर लक्ष्य सेनने २०१८ मध्ये पुरुष एकेरीच्या स्पर्धेत पदके जिंकली होती.

---------------

हिंदुस्थान समाचार / Suraj Chaugule