नवी दिल्ली, 08 नोव्हेंबर (हिं.स.)।बांगलादेश सरकारने भारताकडे देशाच्या माजी पंतप्रधान शेख हसीना यांच्या प्रत्यार्पणाची मागणी पुन्हा एकदा केली आहे. रविवारी बांगलादेशचे कायदामंत्री मोहम्मद असदुज्जमान यांनी ढाका येथे एका प्रशिक्षण कार्यशाळेच्या उद्घाटनानंतर पत्रकारांशी बोलताना शेख हसीना यांना दोषी गुन्हेगार संबोधले. तसेच, प्रस्थापित कायदेशीर प्रक्रियेनुसार आणि दोन्ही देशांमधील प्रत्यार्पण कराराअंतर्गत त्यांना मायदेशी परत आणण्यासाठी आवश्यक ती सर्व पावले उचलली जात असल्याचे त्यांनी स्पष्ट केले.

कायदेशीर प्रक्रियेचा दाखला देताना असदुज्जमान म्हणाले, “माझ्या मते त्या गुन्हेगार आहेत. आमच्या आंतरराष्ट्रीय गुन्हे न्यायाधिकरणाने त्यांना दोषी ठरवले आहे. आमच्यासाठी त्यांची हीच प्रमुख ओळख आहे.”ते पुढे म्हणाले की, हे प्रकरण थेट कायदा मंत्रालयाच्या अखत्यारीत येत नसले, तरी दोन्ही देशांमधील प्रत्यार्पण करारानुसार गृह मंत्रालय या प्रकरणाची कार्यवाही करत आहे.

मंत्र्यांनी सांगितले, “आम्ही प्रत्यार्पण कराराअंतर्गत भारताकडे अधिकृतपणे विनंती केली आहे. या प्रकरणात भावनांना कोणतेही स्थान नाही. यावर केवळ कायद्यानुसारच कार्यवाही केली जाईल. भारताने त्यांना आमच्या ताब्यात दिल्यास आम्ही निश्चित कायदेशीर प्रक्रियेचे पालन करू.”

दरम्यान, भारताच्या परराष्ट्र मंत्रालयाने ढाक्याकडून प्रत्यार्पणासंदर्भातील विनंती प्राप्त झाल्याची पुष्टी केली आहे. मात्र, या विनंत्यांचा प्रस्थापित कायदेशीर आणि राजनैतिक प्रक्रियेनुसार आढावा घेतला जात असून, याबाबत अद्याप कोणताही अंतिम निर्णय घेण्यात आलेला नसल्याचे भारत सरकारने स्पष्ट केले आहे.

५ ऑगस्ट २०२४ रोजी बांगलादेशात झालेल्या मोठ्या जनआंदोलनामुळे शेख हसीना यांची १५ वर्षांची सत्ता संपुष्टात आली होती. त्यानंतर त्यांना आश्रयासाठी भारतात यावे लागले होते. त्यांच्या सत्तेतून पायउतार झाल्यानंतर नोबेल पुरस्कार विजेते मोहम्मद युनूस यांच्या नेतृत्वाखाली अंतरिम सरकार स्थापन करण्यात आले.त्यानंतर नोव्हेंबर २०२५ मध्ये बांगलादेशच्या आंतरराष्ट्रीय गुन्हे न्यायाधिकरणाने २०२४ मधील जनआंदोलनादरम्यान मानवतेविरुद्धच्या गुन्ह्यांप्रकरणी शेख हसीना यांना दोषी ठरवले. त्यांच्या अनुपस्थितीत चालवण्यात आलेल्या खटल्यात एका प्रकरणात त्यांना मृत्युदंड, तर दुसऱ्या प्रकरणात जन्मठेपेची शिक्षा सुनावण्यात आली. बांगलादेशातील संसदीय निवडणुकांनंतर तारिक रहमान यांच्या नेतृत्वाखालील बांगलादेश नॅशनलिस्ट पार्टीने देशात नवीन सरकार स्थापन केले आहे.

---------------

हिंदुस्थान समाचार / Priyanka Bansode