नवी दिल्ली , 09 नोव्हेंबर (हिं.स.)।लष्कर-ए-तोयबाचा संस्थापक आणि २००८ मधील मुंबई दहशतवादी हल्ल्यांचा सूत्रधार हाफिज सईद याचा मुलगा हाफिज तल्हा सईद याने पुन्हा एकदा भारताविरोधात गरळ ओकली आहे.तल्हा याने पाकिस्तान मरकझी मुस्लिम लीग (पीएमएमएल) या पक्षाच्या व्यासपीठावरून पाकिस्तान चळवळीशी संबंधित एकतेची भावना पुन्हा जागृत करण्याची भाषा केली आहे. भारताला एक आव्हान म्हणून सादर करताना त्याने या आव्हानाचा सामना करण्यासाठी पाकिस्तानी नागरिकांनी एकत्र येऊन राष्ट्रीय एकता दाखवण्याची गरज असल्याचे म्हटले आहे.

एका जाहीर सभेला संबोधित करताना तल्हा सईद याने दावा केला की, पाकिस्तान मरकझी मुस्लिम लीग हा त्या जुन्या मुस्लिम लीगचाच विस्तार आहे, जिने भारताच्या फाळणीपूर्वी पाकिस्तानच्या निर्मितीसाठीच्या चळवळीचे नेतृत्व केले होते. फाळणीपूर्वीच्या मुस्लिम लीगप्रमाणेच हा राजकीय पक्षही विविध प्रदेशांमध्ये विखुरलेल्या मुस्लिमांना एका समान राजकीय उद्दिष्टासाठी एकत्र आणण्याची भूमिका बजावू शकतो, असे त्याने म्हटले.

सभेला संबोधित करताना तल्हा म्हणाला, “ही त्याच मुस्लिम लीगची पुढची वाटचाल आहे. जसजसे दिवस, महिने आणि वर्षे पुढे जातील, तसतसे पाकिस्तानची निर्मिती करणारी आणि पाकिस्तान चळवळ चालवणारी मुस्लिम लीग कोणती होती, हे तुम्हाला समजेल.”पाकिस्तानच्या निर्मितीपूर्वी मुस्लिम लीगने विखुरलेल्या मुस्लिम लोकसंख्येला एका राजकीय समुदायात रूपांतरित केले होते, असा दावाही तल्हा याने केला. आज पाकिस्तानची राजकीय परिस्थिती विभागलेली आणि विस्कळीत असल्याचे सांगत, सध्याच्या राजकीय वातावरणात पीएमएमएल असाच बदल घडवून आणू शकते, असे त्याने म्हटले.तो म्हणाला, “आज हीच पाकिस्तान मरकझी मुस्लिम लीग विखुरलेल्या आणि असंघटित जमावाला एका राष्ट्रात, एका सशक्त आणि जिवंत पाकिस्तानी राष्ट्रात एकत्र आणणार आहे.”

आपल्या भाषणात तल्हा याने पाकिस्तानला जागतिक मुस्लिम समुदायाप्रती महत्त्वाची जबाबदारी असलेला देश म्हणून सादर केले. जगभरातील मुस्लिम समाज नेतृत्व आणि सुरक्षेसाठी पाकिस्तानकडे आशेने पाहतो, असा दावा त्याने केला. पाकिस्तान हा मुस्लिम उम्माहचा संरक्षक असल्याचे सांगताना त्याने म्हटले की, “पाकिस्तान हा हरमैन शरीफैनचा (मक्का आणि मदिना येथील इस्लाममधील दोन पवित्र स्थळांचा) संरक्षक आहे.”इस्लामी जगतातील नेतृत्वाबाबत केवळ राजकीय विधाने किंवा दावे करण्याऐवजी पाकिस्तानने आपल्या नागरिकांच्या वर्तनातून आणि कृतीतून आपले स्थान सिद्ध करावे, असेही त्याने म्हटले. “

आपल्या चारित्र्याने आणि कृतीतून आम्ही म्हणजेच पाकिस्तानी राष्ट्र एक सशक्त आणि जबाबदार राष्ट्र आहोत, हे सिद्ध करावे लागेल,” असे तो म्हणाला.

तल्हा याने पीएमएमएलला एक वैचारिक राजकीय संघटना संबोधले. सर्वसामान्य पाकिस्तानी नागरिकांच्या दैनंदिन समस्या सोडवणे हा या पक्षाचा उद्देश असल्याचा दावा त्याने केला. देशाच्या सध्याच्या राजकीय परिस्थितीत या पक्षाची महत्त्वाची भूमिका असल्याचेही त्याने सांगितले. जनतेची सेवा करण्याचा दावा करत त्याने मतदारांना निवडणुकीत पक्षाने उभ्या केलेल्या उमेदवारांना पाठिंबा देण्याचे आवाहन केले.आपल्या भाषणाला पूर्णपणे धार्मिक रंग देत त्याने पक्षाच्या उमेदवारांना मतदान करणे ही एक प्रकारची इबादत (धार्मिक उपासना) असल्याचेही म्हटले.

हाफिज तल्हा सईद हा कुख्यात दहशतवादी संघटना लष्कर-ए-तोयबाचा संस्थापक हाफिज मोहम्मद सईद याचा मुलगा आहे. लष्कर-ए-तोयबा ही पाकिस्तानस्थित दहशतवादी संघटना नोव्हेंबर २००८ मध्ये मुंबईवर झालेल्या भीषण दहशतवादी हल्ल्यांसाठी थेट जबाबदार आहे. भारताची सुरक्षा आणि सार्वभौमत्वासाठी गंभीर धोका ठरलेल्या तल्हाविरोधात कारवाई करत भारत सरकारने एप्रिल २०२२ मध्ये बेकायदेशीर कृत्ये (प्रतिबंध) कायद्यांतर्गत (यूएपीए) त्याला वैयक्तिक दहशतवादी घोषित केले होते.

केंद्रीय गृह मंत्रालयाने जारी केलेल्या अधिसूचनेनुसार, तल्हा याची लष्कर-ए-तोयबाचा वरिष्ठ नेता आणि संघटनेच्या धार्मिक व्यवहारांशी संबंधित विभागाचा प्रमुख म्हणून ओळख पटवण्यात आली होती.प्रतिबंधित संघटनेसाठी सदस्यांची भरती करणे, मोठ्या प्रमाणात निधी गोळा करणे तसेच भारत आणि अफगाणिस्तानमधील भारतीय हितसंबंधांविरोधात दहशतवादी हल्ल्यांचे नियोजन करून ते घडवून आणण्यात सक्रिय सहभाग असल्याचा त्याच्यावर आरोप आहे. भारताविरोधात जिहादला उघडपणे प्रोत्साहन देणारी प्रक्षोभक भाषणे आणि उपदेश केल्याचाही उल्लेख भारतीय अधिकाऱ्यांनी अनेकदा केला आहे.पीएमएमएल यापूर्वीही पाकिस्तानच्या निवडणूक प्रक्रियेत सहभागी झाली आहे. मात्र, या पक्षाचे राजकीय आणि वैचारिक संबंध थेट हाफिज सईद आणि लष्कर-ए-तोयबाच्या जाळ्याशी जोडलेले असल्याने भारताकडून या पक्षाच्या हालचालींवर बारकाईने लक्ष ठेवले जाते.

---------------

हिंदुस्थान समाचार / Priyanka Bansode