मुंबई , 28 फेब्रुवारी (हिं.स.)। इंडियन इन्स्टिट्यूट ऑफ मॅनेजमेंट मुंबईने २०२४-२०२६ बॅचसाठीचा अंतिम प्लेसमेंट हंगाम यशस्वीरित्या पूर्ण करत व्यवस्थापन शिक्षण क्षेत्रातील आपली भक्कम छाप पुन्हा अधोरेखित केली आहे. यंदाच्या प्लेसमेंट प्रक्रियेत एमबीए, एमबीए-ऑपरेशन्स अँड सप्लाय चेन मॅनेजमेंट आणि एमबीए-सस्टेनेबिलिटी मॅनेजमेंट या अभ्यासक्रमांमधील विद्यार्थ्यांना एकूण ५०२ ऑफर मिळाल्या. ५०५ विद्यार्थ्यांच्या बॅचपैकी तीन विद्यार्थ्यांनी उद्योजकतेचा मार्ग स्वीकारत प्लेसमेंटमधून बाहेर पडण्याचा निर्णय घेतला.

महिनाभर चाललेल्या या प्रक्रियेत देश-विदेशातील २०० हून अधिक कंपन्यांनी सहभाग नोंदवला. देशांतर्गत सर्वाधिक वेतन पॅकेज ७१.४ लाख रुपये प्रतिवर्ष इतके राहिले. टॉप १० टक्के विद्यार्थ्यांची सरासरी भरपाई ४७.५ लाख रुपये, टॉप २० टक्क्यांची ४१.४ लाख रुपये तर टॉप ५० टक्क्यांची ३४.५ लाख रुपये इतकी नोंदवली गेली. या आकडेवारीतून गुणवत्तापूर्ण व्यवस्थापन पदवीधरांची उद्योगक्षेत्रात असलेली मागणी स्पष्ट झाली.

कन्सल्टिंग हे सर्वाधिक भरती करणारे क्षेत्र ठरले असून १२३ ऑफर देण्यात आल्या. बँकिंग, फायनान्शियल सर्व्हिसेस आणि इन्शुरन्स (बीएफएसआय) क्षेत्रात वर्षानुवर्षे ३३ टक्के वाढ नोंदवली गेली, जी सर्वाधिक क्षेत्रीय वाढ मानली जाते. एफएमसीजी आणि लॉजिस्टिक्स क्षेत्रातही लक्षणीय वाढ झाली. एबी इनबेव्ह, बजाज ऑटो, सिटी, गोल्डमन सॅक्स, जे.पी. मॉर्गन चेस, पेप्सिको, पिडिलाईट इंडस्ट्रीज आणि स्विगी यांसारख्या नामांकित कंपन्यांनी उच्च प्रभावी भूमिका ऑफर केल्या. तसेच अॅक्सेंचर स्ट्रॅटेजी अँड कन्सल्टिंग, अमेझॉन, हिंदुस्तान युनिलिव्हर, आयटीसी, मायक्रोसॉफ्ट आणि रिलायन्स इंडस्ट्रीज यांसारख्या लेगसी रिक्रूटर्सनीही मोठ्या प्रमाणावर सहभाग घेतला.

संस्थेचे संचालक प्रा. मनोज कुमार तिवारी यांनी सांगितले की, बदलत्या व्यावसायिक वातावरणात एआय-आधारित आणि वित्तीय क्षेत्रातील संधींमध्ये वाढ होत असून आयआयएम मुंबईचे विद्यार्थी परिवर्तनाचे नेतृत्व करण्यास सज्ज आहेत. या यशस्वी प्लेसमेंटमुळे आयआयएम मुंबईचे देशातील अग्रगण्य व्यवस्थापन संस्थांमधील स्थान अधिक बळकट झाले आहे.

---------------

हिंदुस्थान समाचार / Suraj Chaugule