ल्हासा, 08 फेब्रुवारी (हिं.स.)आध्यात्मिक गुरु दलाई लामा यांच्या कार्यालयाने अलीकडे तथाकथित ‘एपस्टीन फाइल्स’च्या माध्यमातून दलाई लामा यांना अमेरिकन वित्तपुरवठादार जेफ्री एपस्टीन यांच्याशी जोडण्याचा प्रयत्न करण्यात आलेल्या मीडिया रिपोर्ट्स आणि सोशल मीडियावरील पोस्ट्सला पूर्णपणे फेटाळून लावले आहे.

दलाई लामा यांच्या कार्यालयाने जारी केलेल्या अधिकृत प्रेस निवेदनात म्हटले आहे, “एपस्टीन फाइल्सशी संबंधित काही अलीकडील मीडिया रिपोर्ट्स आणि सोशल मीडिया पोस्ट्समध्ये दलाई लामा यांना जेफ्री एपस्टीन यांच्याशी जोडण्याचा प्रयत्न केला जात आहे. आम्ही स्पष्टपणे सांगतो की दलाई लामा यांनी कधीही जेफ्री एपस्टीन यांची भेट घेतलेली नाही, तसेच त्यांच्या वतीने कोणालाही त्यांच्याशी भेटण्याची किंवा संवाद साधण्याची परवानगी दिलेली नाही.”या अधिकृत निवेदनात पुढे नमूद करण्यात आले आहे की, अलीकडील मीडिया रिपोर्ट्स आणि सोशल मीडिया पोस्ट्स भ्रामक व तथ्यहीन असून, त्यांचा उद्देश दलाई लामा यांच्या प्रतिमेला चुकीच्या पद्धतीने धक्का पोहोचवण्याचा आहे. कार्यालयाने या आरोपांना “पूर्णपणे निराधार” असे संबोधले आहे.

निवेदनात हेही स्पष्ट करण्यात आले आहे की दलाई लामा हे नेहमीच नैतिक मूल्ये, करुणा आणि अहिंसेच्या तत्त्वांसाठी ओळखले जातात, आणि त्यांना अशा वादग्रस्त प्रकरणांशी जोडणे हे वास्तवापासून खूप दूर आहे.

हे प्रेस स्टेटमेंट 8 फेब्रुवारी 2026 रोजी दलाई लामा यांच्या मुख्यालयातून — थेकचेन चोएलिंग, मॅक्लोडगंज, धर्मशाळा (हिमाचल प्रदेश) — येथून जारी करण्यात आले. तज्ज्ञांच्या मते, ‘एपस्टीन फाइल्स’ संदर्भात सोशल मीडियावर अनेक व्यक्तींची नावे कोणत्याही ठोस पुराव्यांशिवाय जोडली जात आहेत, ज्यामुळे संभ्रम आणि अफवा पसरत आहेत.दलाई लामा यांच्या कार्यालयाकडून देण्यात आलेले हे स्पष्टीकरण अशा सर्व दाव्यांवर स्पष्ट आणि अंतिम उत्तर मानले जात आहे.

दरम्यान, अलीकडील काळात ‘एपस्टीन फाइल्स’ संदर्भात सोशल मीडियावर अनेक प्रसिद्ध व्यक्तींची नावे समोर येत आहेत, मात्र त्यापैकी अनेक दाव्यांना अद्याप अधिकृत दुजोरा मिळालेला नाही. दलाई लामा यांच्या कार्यालयाचे हे निवेदन अशा सर्व आरोपांचे ठाम खंडन म्हणून समोर आले आहे.

---------------

हिंदुस्थान समाचार / Priyanka Bansode