नवी दिल्ली , 10 मार्च (हिं.स.)।संयुक्त राष्ट्रांमध्ये भारताने अफगाणिस्तानमधील परिस्थितीबाबत गंभीर चिंता व्यक्त करत पाकिस्तानकडून करण्यात आलेल्या हवाई हल्ल्यांचा तीव्र निषेध केला आहे. संयुक्त राष्ट्रांमधील भारताचे स्थायी प्रतिनिधी पार्वथनेनी हरीश यांनी सांगितले की, अफगाणिस्तानच्या भूमीवर करण्यात आलेले हे हवाई हल्ले आंतरराष्ट्रीय कायदा, संयुक्त राष्ट्र सनद तसेच कोणत्याही देशाच्या सार्वभौमत्वाच्या तत्त्वांचे स्पष्ट उल्लंघन आहेत.
पार्वथनेनी हरीश यांनी सांगितले की, संयुक्त राष्ट्रांचे महासचिव यांनी सादर केलेल्या अलीकडील अहवालात सीमापार सशस्त्र हिंसाचारामुळे झालेल्या नागरी जीवितहानीबाबत गंभीर चिंता व्यक्त करण्यात आली आहे. भारत या चिंतेला पाठिंबा देत असून सर्व पक्षांनी आंतरराष्ट्रीय कायदा आणि मानवीय कायद्यांतर्गत आपल्या जबाबदाऱ्यांचे पालन करावे, अशी अपील केली आहे, जेणेकरून सामान्य नागरिकांची सुरक्षा सुनिश्चित करता येईल. भारताने नमूद केले की, पवित्र रमजान महिन्यात झालेल्या या हल्ल्यांमध्ये मोठ्या प्रमाणावर निरपराध नागरिकांचा मृत्यू झाला आहे.
संयुक्त राष्ट्र सहाय्यता मिशन (युनामा)च्या माहितीनुसार, ६ मार्च २०२६ पर्यंत १८५ निरपराध लोकांचा मृत्यू झाला असून त्यापैकी सुमारे ५५ टक्के महिला आणि मुले आहेत.या हल्ल्यांमुळे एक लाखांहून अधिक लोकांना आपली घरे सोडावी लागली आहेत. भारताने ही परिस्थिती अत्यंत चिंताजनक असल्याचे सांगत म्हटले की, एका बाजूला आंतरराष्ट्रीय कायदा आणि इस्लामी ऐक्याची भाषा करणे आणि दुसऱ्या बाजूला रमजान महिन्यात निरपराध नागरिकांवर हल्ले करणे हा पूर्णपणे दांभिकपणा आहे.
आपल्या भाषणात भारताने अफगाणिस्तानातील युवक आणि तेथील क्रीडा उत्साहाचाही उल्लेख केला. पार्वथनेनी हरीश यांनी सांगितले की, आज कोणीही अफगाणिस्तानला गेल्यास तेथील युवक मोठ्या उत्साहाने क्रिकेट खेळताना दिसतात. त्यांनी म्हटले की, अफगाणिस्तानचा क्रिकेट संघ जिथेही खेळतो तिथे लोकांची मने जिंकतो. अलीकडे झालेल्या क्रिकेट विश्वचषक स्पर्धेत संघाने दाखवलेला जोश आणि जिद्द अत्यंत कौतुकास्पद होती. भारताने सांगितले की, अफगाणिस्तानच्या क्रिकेट प्रवासाचा भागीदार असल्याचा देशाला अभिमान आहे आणि कठीण परिस्थितीचा सामना करणाऱ्या लोकांच्या चेहऱ्यावर हा संघ आनंद आणत असल्याचे पाहून समाधान वाटते.
भारताने आपल्या निवेदनात दहशतवादाला संपूर्ण मानवजातीसाठी गंभीर धोका असल्याचे म्हटले. पार्वथनेनी हरीश यांनी आयएसआयएल आणि अल-कायदा यांसारख्या दहशतवादी संघटनांबरोबरच त्यांच्या सहयोगी गटांविरोधात जागतिक स्तरावर समन्वित कारवाईची गरज अधोरेखित केली.विशेषतः लष्कर-ए-तैयबा, जैश-ए-मोहम्मद आणि त्यांचा सहयोगी संघ द रेजिस्टन्स फ्रंट यांचा उल्लेख करत त्यांनी सांगितले की, या संघटना आणि त्यांच्या समर्थकांना सीमापार दहशतवाद पसरवण्यापासून रोखण्यासाठी आंतरराष्ट्रीय समुदायाने एकत्रितपणे ठोस पावले उचलली पाहिजेत.
भारताने स्पष्ट केले की, कोणत्याही संघर्षाच्या परिस्थितीत सर्वप्रथम प्राधान्य सामान्य नागरिकांच्या सुरक्षेला दिले गेले पाहिजे. आंतरराष्ट्रीय कायदा आणि मानवीय तत्त्वांचे पालन करत सर्व पक्षांनी हिंसा थांबवून शांतता प्रस्थापित करण्यासाठी प्रयत्न करावेत. भारताच्या मते, अफगाणिस्तानमध्ये स्थैर्य आणि शांतता केवळ त्या प्रदेशासाठीच नव्हे तर संपूर्ण जगासाठी अत्यंत महत्त्वाची आहे. त्यामुळे आंतरराष्ट्रीय समुदायाने एकत्र येऊन असे वातावरण निर्माण करणे आवश्यक आहे, जिथे दहशतवाद आणि हिंसाचाराला स्थान नसेल आणि अफगाणिस्तानच्या नागरिकांना सुरक्षित व उज्ज्वल भविष्य मिळू शकेल.
---------------
हिंदुस्थान समाचार / Priyanka Bansode
