नवी दिल्ली, १० मार्च (हिं.स.) :
पंतप्रधान नरेंद्र मोदी यांनी आज केंद्रीय औद्योगिक सुरक्षा दलाच्या वर्धापनदिनानिमित्त सर्व कर्मचाऱ्यांना शुभेच्छा दिल्या आहेत. दृढनिश्चय, कठोर शिस्त आणि समर्पणासाठी ओळखले जाणारे, सीआयएसएफ देशभरातील महत्त्वाच्या पायाभूत सुविधांचे रक्षण करण्यात महत्त्वाची भूमिका बजावतात. कर्तव्याप्रती असलेली त्यांची अढळ वचनबद्धता भारताच्या सुरक्षिततेत आणि प्रगतीत मोठे योगदान देते, असे मोदी यांनी म्हटले आहे.
केंद्रीय गृहमंत्री आणि सहकार मंत्री अमित शाह यांनी केंद्रीय औद्योगिक सुरक्षा दल (सीआयएसएफ) च्या स्थापना दिनानिमित्त दलातील सर्व जवानांना शुभेच्छा दिल्या. ‘एक्स’ या माध्यमावर केलेल्या संदेशात अमित शाह म्हणाले, “स्थापना दिनानिमित्त सीआयएसएफच्या सर्व जवानांना हार्दिक शुभेच्छा. देशातील महत्त्वाच्या स्थापत्यांची सुरक्षा असो किंवा संकटाच्या काळात राष्ट्राचे संरक्षण असो, त्यांच्या कर्तव्यनिष्ठेतून देशभक्ती आणि व्यावसायिकतेचा खरा आदर्श दिसून येतो. देशासाठी सर्वोच्च बलिदान देणाऱ्या शहीदांना विनम्र अभिवादन.”
---------------
हिंदुस्थान समाचार / सुधांशू जोशी
