चंद्रपूर, 12 मार्च (हिं.स.)।

राज्य शासनाच्या कल्याणकारी शासकीय योजनांची प्रचार व प्रसिध्दी व्हावी, नागरिकांना शासकीय योजनांची माहिती मिळावी व त्याचा लाभ घेता यावा, या उद्देशाने जिल्हा माहिती कार्यालयाच्या वतीने आनंदवन वरोरा येथे छायाचित्र प्रदर्शनी आयोजित करण्यात आली आहे.

सदर प्रदर्शनी ही आनंदवन येथील मुख्यमंत्री सभागृह येथे दि. 12, 13 व 14 मार्च या कालावधीत सकाळी 10 ते सायंकाळी 6 वाजेपर्यंत नागरिकांसाठी उपलब्ध राहील. वरोराचे उपविभागीय अधिकारी डॉ. संदीप भस्के यांच्या हस्ते व तहसीलदार योगेश कौटकर, आनंदवनच्या अंतर्गत व्यवस्थापन प्रमुख डॉ. पल्लवी आमटे यांच्या प्रमुख उपस्थितीत सदर प्रदर्शनीचे उद्घाटन करण्यात आले. 14 मार्च रोजी आनंदवन येथे छत्रपती शिवाजी महाराज महाराजस्व समाधान शिबिराचे आयोजनसुध्दा करण्यात येणार आहे. या तीन दिवसीय प्रदर्शनीचा परिसरातील नागरिकांनी लाभ घ्यावा, असे आवाहन जिल्हा माहिती अधिकारी राजेश येसनकर यांनी केले आहे.

---------------

हिंदुस्थान समाचार / एम.पंकजराव