अबुधाबी , 13 मार्च (हिं.स.)। पश्चिम आशियामध्ये सतत वाढत असलेल्या तणावाच्या पार्श्वभूमीवर दुबईमध्ये सलग दुसऱ्या दिवशी जोरदार स्फोटांचे आवाज ऐकू आले. शुक्रवारी झालेल्या या तीव्र स्फोटांमुळे शहरातील अनेक इमारती हादरल्या. मध्य दुबईच्या एका भागात आकाशात दाट काळ्या धुराचे ढगही दिसून आले.
प्रत्यक्षदर्शींनुसार, दोन मोठे स्फोट झाले ज्यामुळे संपूर्ण परिसरात भीतीचे वातावरण निर्माण झाले. दुबई मीडिया ऑफिसने सोशल मीडियावर या घटनेची माहिती दिली. सुरक्षा दलांनी एक हल्ला वेळेतच हाणून पाडल्याचे त्यांनी सांगितले. या कारवाईदरम्यान हल्ल्याचे अवशेष एका इमारतीच्या बाहेरील भागावर पडले. अधिकाऱ्यांनी या घटनेला किरकोळ स्वरूपाची असल्याचे म्हटले आहे. सुदैवाने, या घटनेत कोणतीही जीवितहानी झाली नाही आणि कोणीही जखमी झाले नाही. अहवालानुसार, स्फोटानंतर दुबईतील प्रमुख शेख झायेद रोडवर सायरनचे आवाज घुमू लागले. पोलिसांनी सुरक्षेच्या दृष्टीने संपूर्ण परिसराला घेराव घातला आहे. ही घटना दुबई इंटरनॅशनल फायनान्शियल सेंटर (DIFC) परिसराच्या जवळ घडली. स्फोट आणि पडलेल्या अवशेषांमुळे इमारतीचे मोठे नुकसान झाले आहे.
दुबईमध्ये सलग दुसऱ्या दिवशी अशी घटना घडली आहे. यापूर्वी गुरुवारी अल बदा भागात ड्रोनशी संबंधित एक घटना समोर आली होती. त्यावेळीही शहराच्या मध्यभागी स्फोटांचे आवाज ऐकू आले होते. 28 फेब्रुवारीपासून पश्चिम आशियामध्ये युद्ध सुरू झाल्यानंतर खाडी प्रदेशातील तणाव मोठ्या प्रमाणात वाढला आहे. इराणच्या हल्ल्यांमुळे आतापर्यंत या परिसरात 11 सामान्य नागरिकांचा मृत्यू झाला आहे. सध्या दुबई प्रशासन परिस्थितीवर बारकाईने लक्ष ठेवून असून कडक सुरक्षा व्यवस्था करण्यात आली आहे.
---------------
हिंदुस्थान समाचार / Priyanka Bansode
