जेरुसलेम , 17 मार्च (हिं.स.)।इस्रायलचे संरक्षणमंत्री इस्रायल कॅट्झ यांनी दावा केला आहे की, सोमवारी रात्री इराणमध्ये झालेल्या हवाई हल्ल्यात अली लारीजानी यांचा मृत्यू झाला आहे. इस्रायली सैन्याने इराणच्या राष्ट्रीय सुरक्षा परिषदेचे सचिव अली लारीजानी यांना लक्ष्य करून हा हल्ला केल्याचे सांगितले आहे. लारीजानी हे इराणचे माजी सर्वोच्च नेते अली खामेनेई यांचे अत्यंत जवळचे सहकारी मानले जात होते. खामेनेई यांच्या मृत्यूनंतर ते इराणच्या सत्ताकारणातील एक महत्त्वाचे आणि प्रभावशाली व्यक्तिमत्त्व बनले होते. दरम्यान, या दाव्यांमध्ये लारीजानी यांच्या कार्यालयाने म्हटले आहे की, ते लवकरच प्रसारमाध्यमांसमोर येऊन याबाबत माहिती देणार आहेत.

या हल्ल्यांमध्ये इस्रायली संरक्षण दलाने (आयडीएफ) बसीज फोर्सचे कमांडर गुलामरेझा सुलेमानी ठार झाल्याचाही दावा केला आहे. सैन्याच्या माहितीनुसार, सुलेमानी यांना एका तंबू छावणीत लक्ष्य करण्यात आले. इस्रायलने त्यांच्या जुन्या मुख्यालयांचा नाश केल्यानंतर बसीज फोर्सने ही छावणी उभारली होती. या हल्ल्यात सुलेमानी यांच्यासह बसीज फोर्सचे उपकमांडर आणि इतर अनेक वरिष्ठ अधिकारीही ठार झाल्याचे सांगण्यात आले आहे.बसीज फोर्स ही इराणमधील आंदोलनांचे कठोरपणे दमन करण्यासाठी ओळखली जाते. अनेक इराणी नागरिकांच्या हत्यांचे आरोपही या दलावर आहेत.

इस्रायलने केवळ इराणी नेत्यांनाच नव्हे, तर पॅलेस्टिनी दहशतवादी संघटनांच्या नेत्यांनाही लक्ष्य केल्याचे सांगितले आहे. सैन्याने पॅलेस्टिनी इस्लामिक जिहाद या संघटनेचा वरिष्ठ नेता अकरम अल-अजौरी याच्यावरही हल्ला केल्याची माहिती दिली आहे. या हल्ल्यात अकरम अल-अजौरी ठार झाल्याचा इस्रायलचा अंदाज असला, तरी त्याची अधिकृत पुष्टी अद्याप झालेली नाही. अली लारीजानी यांच्या मृत्यूच्या दाव्यांदरम्यान इस्रायलच्या पंतप्रधान कार्यालयाने एक्सवर एक पोस्ट शेअर केली. त्याच्या कॅप्शनमध्ये, पंतप्रधान बेंजामिन नेतन्याहू यांनी इराणी सत्तेतील वरिष्ठ अधिकाऱ्यांना लक्ष्य करण्याचे आदेश दिल्याचा उल्लेख करण्यात आला होता.

इस्रायली सैन्यप्रमुख लेफ्टनंट जनरल इयाल जमीर यांनी या कारवाईला मोठे यश असल्याचे म्हटले आहे. त्यांनी सांगितले की, रात्रीभर चाललेल्या हल्ल्यांमध्ये अनेक महत्त्वाची लक्ष्ये नष्ट करण्यात आली असून त्यामुळे सैन्याच्या मोहिमेला मोठी मजबुती मिळेल. त्यांनी पुढे सांगितले की, तेहरानमधील एका सुरक्षित ठिकाणी लपलेल्या आणि गाझा तसेच वेस्ट बँकमधील दहशतवादी कारवायांमध्ये सहभागी असलेल्या दहशतवाद्यांनाही लक्ष्य करण्यात आले.इस्रायलच्या या कारवाईनंतर संपूर्ण प्रदेशातील तणाव आणखी वाढला आहे.

---------------

हिंदुस्थान समाचार / Priyanka Bansode