तेहरान, 17 मार्च (हिं.स.)।पश्चिम आशियामध्ये सुरू असलेला संघर्ष दिवसेंदिवस अधिक भीषण होत चालला आहे. अमेरिका आणि इस्रायलच्या तीव्र हल्ल्यांमुळे इराणही जोरदार प्रत्युत्तर देत आहे. क्षेपणास्त्र आणि ड्रोन हल्ल्यांच्या गडगडाटात हा संघर्ष आता १८व्या दिवशी दाखल झाला असून, अजूनही इराणकडून इस्रायल तसेच खाडी देशांमध्ये असलेल्या अमेरिकन लष्करी तळांवर जोरदार बॉम्बहल्ले सुरू आहेत. त्यामुळे संयुक्त अरब अमिरात (यूएई), सौदी अरेबिया, कतार, इराण आणि लेबनॉन या देशांसमोर सुरक्षा धोक्याचे मोठे आव्हान निर्माण झाले आहे. तेल आणि वायू क्षेत्रांवरील हल्ल्यांमुळे सर्वसामान्य नागरिकांमध्ये भीती आणि चिंता वाढली आहे.

हल्ल्यांची तीव्रता वाढत असतानाच मंगळवारी यूएईच्या पूर्व किनाऱ्यावर असलेल्या फुजैराह येथे एका तेल साठा केंद्रात आग लागली. ही आग ड्रोन हल्ल्यामुळे लागल्याचे सांगण्यात आले. अधिकाऱ्यांनी दिलेल्या माहितीनुसार या घटनेत कोणतीही जीवितहानी झाली नाही. आग विझवण्यासाठी अग्निशमन दल आणि सुरक्षा यंत्रणा तातडीने काम करत आहेत.या घटनेनंतर यूएईच्या लष्कराने मोठा निर्णय घेत आपले हवाई क्षेत्र काही काळासाठी बंद केले. त्यांनी सांगितले की, इराणकडून येणाऱ्या क्षेपणास्त्र आणि ड्रोन धोक्यांना प्रत्युत्तर देण्यासाठी हे पाऊल उचलण्यात आले. नंतर हवाई क्षेत्र पुन्हा सुरू करण्यात आले.यूएईतील दुबईमध्येही क्षेपणास्त्र हल्ल्याचा इशारा देण्यात आला. नागरिकांना तातडीने सुरक्षात्मक उपाययोजना करण्याचे आवाहन करण्यात आले.

दुसरीकडे, इराणची राजधानी तेहरान येथे मंगळवारी रात्री स्फोटांचे आवाज ऐकू आले. हा हल्ला मुसळधार पाऊस आणि वादळाच्या पार्श्वभूमीवर झाला. यामुळे नागरिकांमध्ये भीतीचे वातावरण निर्माण झाले आणि अनेकांनी घरातच आश्रय घेतला. सौदी अरेबियाच्या संरक्षण मंत्रालयाने माहिती दिली की, त्यांनी पूर्व प्रांताकडे येणारे सुमारे १२ ड्रोन हवेतच रोखले. हा प्रदेश तेल आणि वायूसाठी अत्यंत महत्त्वाचा आहे. ड्रोन हल्ला परतवून लावल्यामुळे मोठे नुकसान टळले.

कुवैतमध्ये १६ जणांना अटक करण्यात आली.त्यांचा हिजबुल्लाशी संबंध असल्याचा संशय आहे.त्यांच्या ताब्यातून शस्त्रे, ड्रोन आणि गुप्त उपकरणे जप्त करण्यात आली.अबू धाबी येथे क्षेपणास्त्र हल्ल्यादरम्यान एका पाकिस्तानी नागरिकाचा मृत्यू झाला. क्षेपणास्त्र रोखताना त्याचे तुकडे खाली पडल्याने ही दुर्घटना घडली. आतापर्यंत यूएईमध्ये एकूण ८ जणांचा मृत्यू झाला आहे. कतारमध्येही क्षेपणास्त्र हल्ल्याची माहिती समोर आली. तेथील संरक्षण मंत्रालयाने सांगितले की त्यांनी क्षेपणास्त्र अडवले, मात्र एका औद्योगिक परिसरात आग लागली. दोहा येथे स्फोटांचे आवाज ऐकून नागरिक घाबरले.

या संपूर्ण प्रदेशात संघर्ष अत्यंत गंभीर स्वरूप धारण करत आहे. इराणमध्ये सुमारे १,३०० जणांचा मृत्यू झाला आहे. लेबनॉनमध्ये ८५० पेक्षा अधिक लोक मृत्युमुखी पडले.इस्रायलमध्ये १२ जणांचा मृत्यू झाला. अमेरिकेचे १३ सैनिक मृत्यूमुखी पडले असून सुमारे २०० जण जखमी झाले आहेत. दरम्यान, अमेरिकेचे राष्ट्राध्यक्ष डोनाल्ड ट्रम्प यांनी सांगितले की, अनेक देशांनी होर्मुज सामुद्रधुनीच्या सुरक्षेसाठी मदत करण्याचे आश्वासन दिले आहे, मात्र काही देशांनी सहकार्य करण्यात विलंब केला आहे.

होर्मुज सामुद्रधुनी हा तेल आणि वायू वाहतुकीसाठी अत्यंत महत्त्वाचा मार्ग आहे. या मार्गावर वाढलेल्या हल्ल्यांमुळे आणि धोक्यांमुळे जगभरातील तेल आणि वायूच्या किमतींवर परिणाम होऊ शकतो. या सर्व घटनांवरून स्पष्ट होते की, पश्चिम आशियातील तणाव सातत्याने वाढत आहे. ड्रोन आणि क्षेपणास्त्र हल्ल्यांमुळे सामान्य नागरिकांमध्ये भीतीचे वातावरण निर्माण झाले असून तेल-वायू क्षेत्रावर गंभीर सुरक्षा धोके निर्माण झाले आहेत.

---------------

हिंदुस्थान समाचार / Priyanka Bansode