नवी दिल्ली , 20 मार्च (हिं.स.)।काँग्रेसचे खासदार शशी थरूर यांनी शुक्रवारी एक महत्त्वपूर्ण विधान केले. त्यांनी म्हटले की, इराणचे सर्वोच्च नेते आयातुल्ला अली खामेनेई यांच्या निधनानंतर भारताने योग्य वेळी शोकसंदेश पाठवायला हवा होता. थरूर यांच्या मते, भारताने अमेरिका आणि इस्रायलच्या हल्ल्याचा निषेध केला नसला तरी शोक व्यक्त करणे हा सर्वात योग्य निर्णय ठरला असता.

एका वृत्तसंस्थेशी बोलताना थरूर म्हणाले की, सरकारच्या या निर्णयावर प्रश्न उपस्थित करणाऱ्यांच्या मताशी ते सहमत आहेत. त्यांनी सांगितले की, ज्या दिवशी खामेनेई यांचे निधन झाले, त्याच दिवशी भारताने संवेदना व्यक्त करायला हव्या होत्या. इराणमधील खामेनेई यांचे उच्च पद आणि प्रभाव लक्षात घेता तसे करणे पूर्णपणे योग्य ठरले असते.शशी थरूर यांनी २०२४ मधील एका जुन्या घटनेचाही उल्लेख केला. त्यांनी आठवण करून दिली की, इराणचे माजी राष्ट्रपती इब्राहिम रईसी यांचा हेलिकॉप्टर अपघातात मृत्यू झाल्यानंतर भारताने तत्काळ राजकीय शोक जाहीर करून संवेदना व्यक्त केल्या होत्या. मात्र, दिल्लीतील इराणी दूतावासात शोकपुस्तिका उघडण्यात आल्यानंतर भारताच्या परराष्ट्र सचिवांना त्वरित संवेदना व्यक्त करण्यासाठी पाठवण्यात आले, याबद्दल त्यांनी समाधान व्यक्त केले.

काँग्रेस नेत्यांनी शोक व्यक्त करणे आणि निषेध करणे यातील फरकही स्पष्ट केला. त्यांनी सांगितले की, राजकीय कारणांमुळे भारताला अमेरिका-इस्रायलच्या हल्ल्याचा निषेध करायचा नसेल, तर ते समजण्यासारखे आहे. मात्र शोक व्यक्त करणे ही वेगळी बाब आहे. आपल्या प्रियजनांना गमावलेल्या लोकांप्रती आणि त्या देशाच्या सरकारप्रती सहानुभूती दर्शवण्याचा तो एक मार्ग आहे. भारताने किमान इतकी सहानुभूती तरी दाखवायला हवी होती.

थरूर यांना त्यांच्या इंग्रजी दैनिकात प्रकाशित झालेल्या लेखाबद्दल — जो त्यांच्या पक्षाच्या भूमिकेपेक्षा थोडा वेगळा होता — विचारण्यात आले असता त्यांनी सविस्तर स्पष्टीकरण दिले. ते म्हणाले की, विरोधी पक्षाच्या नेत्या सोनिया गांधी आणि इतर विरोधी नेत्यांनी मांडलेल्या भूमिकेचे ते पूर्णपणे कौतुक करतात. विरोधी पक्ष म्हणून नैतिक भूमिका घेणे शक्य असते. मात्र त्यांचा लेख हा सरकारने काय करायला हवे यावर अधिक केंद्रित होता.

ते पुढे म्हणाले की, जर ते काँग्रेस सरकारलाही सल्ला देत असते, तरी अशा तणावपूर्ण काळात संयमाने वागण्याचाच सल्ला दिला असता. थरूर यांच्या मते, संयम म्हणजे माघार नव्हे; उलट ती ताकदीची निशाणी आहे. यामुळे आपण आपल्या राष्ट्रीय हितांची योग्य जाणीव ठेवून त्यांचे संरक्षण करण्यासाठी प्राधान्याने पावले उचलतो, हे दिसून येते.आंतरराष्ट्रीय संघर्षांच्या काळात सरकारने अत्यंत सावधगिरीने निर्णय घ्यावेत, असे त्यांनी अधोरेखित केले. देशाच्या हितांचे संरक्षण करणे हीच सर्वात मोठी प्राथमिकता असली पाहिजे, असेही त्यांनी स्पष्ट केले.

---------------

हिंदुस्थान समाचार / Priyanka Bansode