लातूर, 22 मार्च (हिं.स.)।

सरकारने माजी सैनिकांच्या कुटुंबांसाठी मोठा दिलासा देणारा महत्त्वपूर्ण निर्णय घेतला आहे. माजी सैनिकांच्या मुलींच्या विवाहासाठी दिल्या जाणाऱ्या आर्थिक सहाय्यात मोठी वाढ करण्यात आली असून, यापूर्वी मिळणारे ₹50,000 अनुदान आता थेट ₹1,00,000 करण्यात आले आहे. या निर्णयामुळे हजारो कुटुंबांना आर्थिक आधार मिळणार आहे.

योजनेच्या प्रमुख अटी

ही योजना हवालदार रँकपर्यंतच्या माजी सैनिकांच्या मुलींसाठी लागू आहे.

मुलीचे किमान वय 18 वर्षे असणे आवश्यक आहे.

संबंधित मुलीचे नाव माजी सैनिकाच्या डिस्चार्ज बुकमध्ये असणे बंधनकारक आहे.

विवाह झाल्यानंतर 6 महिन्यांच्या आत ऑनलाइन अर्ज करणे आवश्यक आहे.

आवश्यक कागदपत्रे

10वी / 12वीचे शैक्षणिक प्रमाणपत्र

विवाह नोंदणी प्रमाणपत्र (बारकोडसहित)

वधू-वरांचा फोटो व स्वाक्षरी

सध्याची स्थिती

जिल्ह्यातील 95 माजी सैनिकांच्या मुलींचे अर्ज मंजूर झाले असून, या महिन्यापासून अनुदानाची रक्कम प्रत्यक्ष वितरणास सुरुवात होणार आहे. संबंधित लाभार्थ्यांच्या खात्यात रक्कम जमा केली जाणार आहे.

शैक्षणिक अनुदानातही मोठी वाढ

सरकारने माजी सैनिकांच्या पाल्यांच्या शिक्षणासाठीही महत्त्वाचा निर्णय घेतला आहे.

शैक्षणिक अनुदान ₹12,000 वरून ₹24,000 प्रति वर्ष करण्यात आले आहे.

या योजनेअंतर्गत 1494 अर्ज मंजूर झाले असून, लवकरच रक्कम लाभार्थ्यांच्या खात्यात जमा होणार आहे.

एकूणच, हा निर्णय माजी सैनिकांच्या कुटुंबांसाठी मोठा दिलासा ठरणार असून, त्यांच्या मुलींच्या विवाह व शिक्षणासाठी मजबूत आर्थिक पाठबळ मिळणार आहे.

---------------

हिंदुस्थान समाचार / Mahesh Madanrao Chitnis