मुंबई, 08 मार्च (हिं.स.)। शेअर बाजारात गुंतवणूकदारांसाठी पुढील आठवडा महत्त्वाचा ठरणार असून चार नवीन आयपीओ खुलणार आहेत. यामध्ये राजपुताना स्टेनलेस, इनोविजन,एप्सिस एअरोकॉम आणि राजमार्ग इन्फ्रा इन्व्हेस्टमेंट ट्रस्ट या कंपन्यांचा समावेश आहे. यापैकी एप्सिस एअरोकॉमचा आयपीओ एसएमई श्रेणीतील असेल, तर उर्वरित तीन आयपीओ मुख्य बाजारपेठेतील म्हणजेच मेनबोर्ड श्रेणीतील असतील.
राजपुताना स्टेनलेसचा आयपीओ ९ मार्च रोजी गुंतवणूकदारांसाठी खुला होणार असून ११ मार्चपर्यंत अर्ज करता येणार आहे. या आयपीओसाठी प्रति शेअर किंमत पट्टा ११६ ते १२२ रुपये निश्चित करण्यात आला आहे. या इश्यूमध्ये किमान ११० शेअर्सचा लॉट निश्चित करण्यात आला असून गुंतवणूकदारांना किमान ११० शेअर्ससाठी अर्ज करावा लागणार आहे. सध्या या आयपीओचा ग्रे मार्केट प्रीमियम म्हणजेच जीएमपी ८ मार्च रोजी सुमारे २ रुपये असल्याचे सांगितले जात आहे. मात्र लिस्टिंगपर्यंत या प्रीमियममध्ये बदल होण्याची शक्यता असते.
इनोविजन कंपनीचा आयपीओ १० मार्च रोजी खुला होईल आणि १२ मार्चपर्यंत गुंतवणूकदारांना अर्ज करण्याची संधी मिळेल. या आयपीओचा किंमत पट्टा ५२१ ते ५४८ रुपये असा निश्चित करण्यात आला आहे. या इश्यूमध्ये २७ शेअर्सचा किमान लॉट ठेवण्यात आला आहे. मात्र सध्या या आयपीओचा ग्रे मार्केट प्रीमियम शून्य असल्याची माहिती समोर आली आहे.
एप्सिस एअरोकॉमचा एसएमई श्रेणीतील आयपीओ ११ मार्च रोजी खुला होणार असून १३ मार्चपर्यंत अर्ज करता येणार आहे. या आयपीओचा किंमत पट्टा १०४ ते ११० रुपये निश्चित करण्यात आला आहे. या इश्यूमध्ये किमान १२०० शेअर्सचा लॉट ठेवण्यात आला आहे. सध्या या आयपीओलाही ग्रे मार्केटमध्ये कोणताही प्रीमियम मिळत नसल्याचे दिसून येत आहे.
दरम्यान, राजमार्ग इन्फ्रा इन्व्हेस्टमेंट ट्रस्टचा आयपीओ देखील ११ मार्च रोजी खुला होणार असून १३ मार्चपर्यंत गुंतवणूकदार अर्ज करू शकतील. या आयपीओसाठी किंमत पट्टा ९९ ते १०० रुपये प्रति शेअर असा निश्चित करण्यात आला आहे. हा इश्यू ६,००० कोटी रुपयांच्या किमतीचा बुक-बिल्ट ऑफरिंग आहे आणि त्यात पूर्णपणे ६० कोटी शेअर्सचा नवीन इश्यू आहे.एसबीआय कॅपिटल मार्केट्स या इश्यूसाठी बुक-रनिंग लीड मॅनेजर आहे, तर केफिन टेक्नॉलॉजीजची रजिस्ट्रार म्हणून नियुक्ती करण्यात आली आहे. त्यामुळे पुढील आठवड्यात गुंतवणूकदारांना चार वेगवेगळ्या आयपीओमध्ये गुंतवणुकीची संधी मिळणार आहे.
---------------
हिंदुस्थान समाचार / Suraj Chaugule
