वॉशिंग्टन, 08 मार्च (हिं.स.)।इस्रायल आणि अमेरिका सतत इराणवर हल्ले करत आहेत. आज या युद्धाचा नववा दिवस आहे आणि अजूनही युद्ध संपण्याची कोणतीही चिन्हे दिसत नाहीत. अमेरिकेचे राष्ट्राध्यक्ष डोनाल्ड ट्रम्प यांनी म्हटले आहे की, आम्ही इराणच्या नेतृत्वाला यापूर्वी अनेक वेळा संपवले आहे. त्यांनी आत्मसमर्पण करावे, अन्यथा नंतर आत्मसमर्पण करणारा कोणीही उरणार नाही.

अमेरिकेचे राष्ट्राध्यक्ष डोनाल्ड ट्रम्प म्हणाले, “आम्ही त्यांच्या ४४ नौदल जहाजांचा नाश केला आहे. त्यांच्या हवाई दलातील सर्व विमाने नष्ट केली आहेत. त्यांच्या बहुतेक क्षेपणास्त्रांचाही नाश केला आहे. आता फारच कमी क्षेपणास्त्रे येत आहेत. आम्ही त्यांच्या क्षेपणास्त्र निर्मिती केंद्रांवरही मोठे हल्ले केले आहेत. त्यांच्या ड्रोन क्षमतेत मोठी घट झाली आहे. त्यांची सैन्यशक्ती जवळपास संपली आहे. आम्ही त्यांच्या सैन्यावरही मोठा हल्ला करू शकतो, पण कदाचित करू किंवा कदाचित नाही. याबाबत अद्याप कोणताही निर्णय घेतलेला नाही.”

दुसरीकडे इराणही युद्धातून माघार घेण्यास तयार नाही. इराणचे म्हणणे आहे की सर्वोच्च नेते अयातोल्ला अली खामेनेई यांच्या मृत्यूचा बदला घेतल्याशिवाय ते अमेरिका आणि इस्रायलविरुद्धचा संघर्ष थांबवणार नाहीत. इराणकडून युद्धातून मागे हटण्याची कोणतीही चिन्हे दिसत नाहीत. मात्र इराणच्या राष्ट्राध्यक्षांनी शनिवारी शेजारी देशांवर झालेल्या हल्ल्यांबद्दल माफी मागितली आहे. इराणचे राष्ट्राध्यक्ष मसूद पेजेशकियन यांनी सांगितले की, इराणी हल्ल्यांमुळे प्रभावित झालेल्या शेजारी देशांची ते वैयक्तिकरित्या माफी मागतात. त्यांनी खाडी देशांना आवाहन केले की त्यांनी अमेरिका आणि इस्रायल यांच्यासोबत मिळून इराणविरुद्ध चालविल्या जाणाऱ्या लष्करी मोहिमेत सहभागी होऊ नये.

पेजेशकियन म्हणाले की, इराणच्या तात्पुरत्या नेतृत्व परिषदेने यावर सहमती दर्शवली आहे की, जोपर्यंत कोणत्याही शेजारी देशाच्या भूमीवरून इराणवर हल्ला केला जात नाही, तोपर्यंत इराणही त्या देशांना लक्ष्य करणार नाही.त्यांनी ठामपणे सांगितले की, प्रादेशिक वादांचे निराकरण कूटनीतीच्या माध्यमातूनच केले पाहिजे. त्यांनी पुढे असेही सांगितले की सर्वोच्च नेते अयातोल्ला अली खामेनेई यांच्या मृत्यूचा बदला घेतल्याशिवाय ते अमेरिका आणि इस्रायलविरुद्धचा संघर्ष थांबवणार नाहीत.

---------------

हिंदुस्थान समाचार / Priyanka Bansode