नवी दिल्ली , 08 मार्च (हिं.स.)।आंतरराष्ट्रीय महिला दिनच्या निमित्ताने राष्ट्रपती द्रौपदी मुर्मू यांनी महिलांची शक्ती, त्यांच्या उपलब्धी आणि समाजातील योगदानाचे कौतुक केले. महामहीम राष्ट्रपती म्हणाल्या की महिला कोणापेक्षा कमी नाहीत आणि त्यांना योग्य संधी व पाठबळ मिळाले तर त्या प्रत्येक क्षेत्रात मोठी कामगिरी करू शकतात.

रविवारी,“महिला व बाल विकास मंत्रालय” तर्फे आयोजित कार्यक्रमात राष्ट्रपतींनी सांगितले की आंतरराष्ट्रीय महिला दिन हा केवळ महिलांच्या यशाचा सन्मान करण्याचा दिवस नाही, तर त्यांच्या सशक्तीकरणासाठी देशाची बांधिलकी पुन्हा अधोरेखित करण्याचीही ही संधी आहे. राष्ट्रपती मुर्मू म्हणाल्या की आज महिला शिक्षण, प्रशासन, न्यायव्यवस्था, सशस्त्र सेना, वैद्यकीय क्षेत्र, विज्ञान, तंत्रज्ञान, कला, क्रीडा आणि उद्योजकता अशा अनेक क्षेत्रांत अग्रणी भूमिका बजावत आहेत. त्यांनी विशेषतः ग्रामीण महिलांचा उल्लेख करत सांगितले की स्वयं-सहाय्यता गटांच्या माध्यमातून गावांतील महिला आर्थिकदृष्ट्या स्वावलंबी होत आहेत आणि गावाच्या विकासात नेतृत्वही करत आहेत. मुर्मू पुढे म्हणाल्या, “महिलांमध्ये ताकद आहे. आम्ही कोणापेक्षा कमी नाही. आमच्यातही सामर्थ्य आहे.” त्यांच्या मते महिलांना संधी आणि सहकार्य मिळाल्यास त्या प्रत्येक क्षेत्रात उत्कृष्ट कामगिरी करू शकतात. राष्ट्रपतींनी असेही सांगितले की महिलांनी अनेक यश संपादन केले असले तरी समाजात समान सहभाग सुनिश्चित करण्याच्या मार्गात अजूनही अनेक आव्हाने आहेत. ही आव्हाने केवळ कायद्याने दूर होणार नाहीत, तर समाजाच्या विचारसरणीत बदल होणेही तितकेच आवश्यक आहे.

यावेळी त्यांनी पालकांना आवाहन केले की घरात मुलगा आणि मुलगी यांच्यात कोणताही भेदभाव करू नये. तसेच सासूनेही आपल्या मुलगी आणि सून यांच्यात फरक करू नये आणि सुनेलाही मुलीप्रमाणेच सन्मान मिळायला हवा, असे त्यांनी सांगितले. त्यांच्या मते खरी समानता तेव्हाच सुरू होते जेव्हा प्रत्येक महिलेला मुलगी म्हणून आदर दिला जातो. राष्ट्रपती मुर्मू यांनी आंतरराष्ट्रीय महिला दिनानिमित्त आयोजित ‘शक्ती वॉक’ या कार्यक्रमाचेही कौतुक केले. या कार्यक्रमाचे आयोजन “महिला व बाल विकास मंत्रालय” ने केले होते. या उपक्रमात सहभागी महिलांनी इंडिया गेटपासून विजय चौकपर्यंत पायी मार्च काढला. देशभरातून आलेल्या महिलांच्या समर्पण आणि उत्साहाचे राष्ट्रपतींनी विशेष कौतुक केले. राष्ट्रपतींनी संविधान निर्माते डॉ. भीमराव आंबेडकर यांच्या प्रसिद्ध विधानाची आठवण करून देत म्हटले की कोणत्याही समाजाची प्रगती मोजण्याचा खरा निकष म्हणजे त्या समाजातील महिलांनी केलेली प्रगती होय.

---------------

हिंदुस्थान समाचार / Priyanka Bansode