सायप्रस, 15 एप्रिल (हिं.स.)उझबेक ग्रँडमास्टर जावोखिर सिंदारोव्हने एक फेरी शिल्लक असतानाच कॅन्डिडेट्स स्पर्धेत विजय मिळवला. त्याने डच बुद्धिबळपटू अनिश गिरीसोबत सामना बरोबरीत सोडवला आणि आता त्याचा सामना भारताच्या गुकेश डोम्माराजूशी होणार आहे.

या २० वर्षीय बुद्धिबळपटूने सायप्रसमध्ये झालेल्या या स्पर्धेत आपल्या १३ पैकी ६ सामने जिंकून आणि एकही सामना न गमावता दणदणीत कामगिरी केली. कॅन्डिडेट्स स्पर्धेत यापूर्वी कधीही न पाहिलेली अशी ही एकतर्फी कामगिरी होती.

मागील फेरीत चीनच्या वेई यी विरुद्धची विजयाची स्थिती निर्णायक विजयात रूपांतरित करण्यात डच बुद्धिबळपटू अपयशी ठरल्यामुळे, सिंदारोव्ह ९.५ गुणांवर पोहोचला—आणि ७.५ गुणांसह दुसऱ्या स्थानी असलेल्या गिरीपेक्षा तो दोन गुणांनी आघाडीवर गेला.

हा माझ्या आयुष्यातील सर्वात कठीण आठवडा होता. गेल्या काही दिवसांत तर मला नीट झोपही लागली नाही. हा सामना जिंकून या स्पर्धेचा समारोप करता आला, याचा मला खूप आनंद आहे, असे सिंदारोव्हने सांगितले.

या स्पर्धेकडे, जुन्या पिढीतील दिग्गज बुद्धिबळपटूंना जागतिक विजेतेपदासाठी पुन्हा एकदा आव्हान उभे करण्याची कदाचित शेवटचीच संधी म्हणून पाहिले जात होते. पण अमेरिकेचे फॅबियानो कारुआना आणि हिकारू नाकामुरा यांनी विजेतेपदासाठी कधीच गांभीर्याने आव्हान उभे केले नाही.

२०२४ मध्ये, आपल्या सामन्यातील १४व्या आणि अंतिम फेरीत चीनच्या डिंग लिरेनचा पराभव करून गुकेशने विजेतेपद पटकावले. पाच वेळा विश्वविजेता ठरलेला आणि आजही जागतिक क्रमवारीत अव्वल स्थानी असलेला मॅग्नस कार्लसन याने, प्रेरणेचा अभाव असल्याचे कारण देत विजेतेपद सोडून दिल्यानंतर, डिंगने स्वतः इयान नेपोम्नियाचीचा पराभव करून विजेतेपद मिळवले होते.

आगामी विश्व अजिंक्यपद सामन्याबद्दल मला सध्या फारसा विचार करायचा नाही. तो सामना अत्यंत कठीण असेल, याची मला पूर्ण जाणीव आहे, असे सिंदारोव्ह म्हणाला.

या स्तरावर खेळण्याचा अनुभव गुकेशकडे आहे. पण, माझ्याकडे एक अत्यंत सक्षम संघ आहे. मला अजून बऱ्याच गोष्टींवर काम करायचे आहे; त्यासाठी मी कसून मेहनत घेईन आणि मला मिळणाऱ्या संधींचे सोने करेन.

सिंदारोव्हची ही कामगिरी आणि तरुण पिढीची होत असलेली व्यापक प्रगती यामुळे कार्लसेनच्या संभाव्य पुनरागमनाबद्दल पुन्हा एकदा चर्चांना उधाण येण्याची शक्यता असली, तरीही 'क्लासिकल' विश्व अजिंक्यपद स्पर्धेच्या चक्रात (cycle) पुन्हा परतण्याचा आपला कोणताही इरादा नसल्याचे या नॉर्वेजियन बुद्धिबळपटूने स्पष्ट केले आहे. दरम्यान, विश्व अजिंक्यपद सामन्याची नेमकी तारीख आणि ठिकाण अद्याप जाहीर करण्यात आलेले नाही.

---------------

हिंदुस्थान समाचार / वृषाली देशपांडे