तेहरान, 18 एप्रिल (हिं.स.)इराणने होर्मुझची सामुद्रधुनी पुन्हा बंद केली आहे. इराणी लष्कराने या सागरी मार्गावर पुन्हा कडक निगराणी लागू केली आहे. इराणच्या लष्करी कमांडने एका निवेदनात म्हटले आहे की, इराणी बंदरांमधून ये-जा करणाऱ्या जहाजांवर नौदल नाकेबंदी सुरू ठेवून वॉशिंग्टनने आपले वचन मोडले आहे.जोपर्यंत अमेरिका इराणमधून ये-जा करणाऱ्या सर्व जहाजांसाठी वाहतुकीचे स्वातंत्र्य पुनर्संचयित करत नाही, तोपर्यंत होर्मुझच्या सामुद्रधुनीतील परिस्थिती पूर्णपणे नियंत्रणात राहील, असे या निवेदनात म्हटले आहे.

इराणच्या सेंट्रल हेडक्वार्टर्स ऑफ द होली प्रोफेट (CHH) च्या प्रवक्त्याने सांगितले की, सदिच्छा म्हणून वाटाघाटींनंतर तेलवाहू जहाजे आणि व्यापारी जहाजांना मर्यादित आणि नियंत्रित पद्धतीने सामुद्रधुनीतून जाण्याची परवानगी देण्यास तेहरानने पूर्वी सहमती दर्शवली होती.

अमेरिकेने वारंवार आपली आश्वासने मोडली आहेत. त्यांनी सांगितले की, अमेरिका नाकेबंदी लागू करण्याच्या नावाखाली समुद्री चाचेगिरी आणि लूटमार यांसारख्या कारवायांमध्ये गुंतली आहे. यामुळेच इराणने आता आपली भूमिका अधिक कठोर केली आहे. या निवेदनात स्पष्टपणे म्हटले आहे की, होर्मुझच्या सामुद्रधुनीवरील नियंत्रण आता पुन्हा कडक करण्यात आले आहे आणि संपूर्ण जलमार्ग आता इराणी सशस्त्र दलांच्या थेट व्यवस्थापन आणि नियंत्रणाखाली असेल.

इराणने हे देखील स्पष्ट केले की, जोपर्यंत अमेरिका इराणी जहाजांसाठी नौवहनाचे संपूर्ण स्वातंत्र्य सुनिश्चित करत नाही, तोपर्यंत सध्याची परिस्थिती कायम राहील. डोनाल्ड ट्रम्प यांनी 'ट्रुथ सोशल' या सोशल मीडिया प्लॅटफॉर्मवर एक पोस्ट शेअर केल्यावर हा तणाव आणखी वाढला. ट्रम्प यांनी जाहीर केले की, जोपर्यंत तेहरानसोबतचा सर्वसमावेशक शांतता करार किंवा समझोता १००% पूर्ण होत नाही, तोपर्यंत इराणी बंदरांवरील अमेरिकेची नौदल नाकेबंदी पूर्ण ताकदीने सुरू राहील. ट्रम्प यांनी असेही म्हटले की, ही प्रक्रिया खूप लवकर पूर्ण होईल अशी त्यांना आशा आहे.

---------------

हिंदुस्थान समाचार / वृषाली देशपांडे