तिरुवनंतपुरम, 02 एप्रिल (हिं.स.) केरळचे क्रीडा मंत्री व्ही. अब्दुरहिमान यांनी अर्जेंटिनाच्या फुटबॉल संघावर गंभीर आरोप केले आहेत. त्यांनी दावा केला आहे की, पुरेसे मानधन मिळूनही हा संघ केरळला भेट देण्याचे आपले वचन पाळण्यात अपयशी ठरला आहे. निराशा व्यक्त करताना ते म्हणाले की, जगप्रसिद्ध फुटबॉलपटू लिओनेल मेस्सीचा समावेश असलेल्या अर्जेंटिना संघाच्या संभाव्य दौऱ्याचे नियोजन करण्यासाठी विशेष प्रयत्न करण्यात आले होते. अब्दुरहिमान यांनी सांगितले की, या कार्यक्रमाच्या आयोजनासाठी वाटाघाटींच्या अनेक फेऱ्या झाल्या होत्या.

अब्दुरहिमान यांनी सांगितले, मी अर्जेंटिना संघाच्या केरळ दौऱ्यासंदर्भात अनेक वाटाघाटी केल्या. आंतरराष्ट्रीय फुटबॉल संघाला २५० कोटी रुपये देण्यासाठी प्रायोजकत्वाची व्यवस्था करणे सोपे नव्हते. पण पैसे मिळाल्यानंतर अर्जेंटिना संघाने आमचा विश्वासघात केला. त्यांच्याकडून अशा विश्वासघाताची आम्हाला अपेक्षा नव्हती. त्यांनी वचन देऊन नंतर ते मोडावे, अशी आम्हाला अपेक्षा नव्हती.

अब्दुरहिमान यांनी असाही दावा केला की, या कृतीचा परिणाम केवळ केरळवरच झाला नाही. ते म्हणाले की, या कृतीमुळे इतर देशांमधीलही अशीच परिस्थिती उघड झाली आहे. ते म्हणाले, अर्जेंटिनाच्या संघानेही इतर देशांकडून पैसे घेतले, पण ते कधीही खेळले नाहीत. या परिस्थितीमुळे अर्जेंटिनाच्या फुटबॉल संघाविरुद्ध याचिका दाखल करणे आवश्यक आहे आणि त्यांनी आम्हाला नुकसान भरपाई दिली पाहिजे.

अब्दुरहिमान यांनी वैयक्तिक निराशाही व्यक्त केली आणि म्हणाले की, राज्यातील चाहत्यांमधील उत्साह पूर्णपणे नष्ट झाला आहे. ते म्हणाले, अर्जेंटिनाच्या कृतीने केरळचे फुटबॉल चाहते निराश झाले आहेत. मी माझी निराशा कोणाकडे व्यक्त करावी हे मला कळत नाही.

गेल्या वर्षी नोव्हेंबरमध्ये लिओनेल मेस्सीच्या नेतृत्वाखालील अर्जेंटिना संघ मार्च २०२६ मध्ये केरळमध्ये एक प्रदर्शनी सामना खेळण्यासाठी येणार होती. पण, असे घडले नाही.

---------------

हिंदुस्थान समाचार / वृषाली देशपांडे