चेन्नई , 20 एप्रिल (हिं.स.) - “आरएसएस ही तामिळविरोधी आणि द्रविडविरोधी संघटना आहे”, असे आरोप काँग्रेस नेते राहुल गांधी यांनी सोमवारी केला आहे. ते तामिळनाडूतील थुथुकुडी येथे एका प्रचारसभेला संबोधित करताना बोलत होते. यावेळी प्रचारसभेत राहुल गांधी यांनी आरएसएस आणि भाजपवर जोरदार टीका केली. राहुल गांधी म्हणाले की, आरएसएस आणि भाजप यांना भारत हा एकच जनता, एकच संस्कृती, एकच धर्म आणि एकच भाषा असलेला देश असावा असे वाटते. यासोबतच त्यांनी एआयएडीएमकेच्या सध्याच्या स्थितीवरही प्रश्न उपस्थित केले. ते म्हणाले की, तामिळनाडूतील जनतेची सेवा करणारी जुनी एआयएडीएमके आता पूर्णपणे संपुष्टात आली आहे.

राहुल गांधी यांच्या मते, आजची एआयएडीएमके केवळ पोकळ संरचना बनून राहिली आहे आणि भाजप या पक्षाचा वापर तामिळनाडूच्या राजकारणात प्रवेश करण्यासाठी करू इच्छित आहे. त्यांनी आरोप केला की, एआयएडीएमकेचे नेते भ्रष्टाचारामुळे कमकुवत झाले आहेत. याच कमकुवतपणाचा फायदा घेत भाजप तामिळनाडूमध्ये आपले स्थान निर्माण करू पाहत आहे.

राहुल गांधी यांनी दावा केला की, सध्या एआयएडीएमके चालवणाऱ्यांवर केंद्रीय गृहमंत्री अमित शाह आणि पंतप्रधान नरेंद्र मोदी यांचे पूर्ण नियंत्रण आहे. सभेत राहुल गांधी यांनी बिहारच्या राजकारणाचाही उल्लेख केला. ते म्हणाले की, बिहारमध्ये नितीश कुमार यांना मुख्यमंत्रीपदावरून हटवून भाजपच्या माणसाला त्या पदावर बसवण्यात आले. राहुल गांधी यांनी आरोप केला की, नितीश कुमार यांच्या जुन्या कामांमुळे भाजप त्यांना पूर्णपणे आपल्या ताब्यात ठेवत आहे. त्यांनी दावा केला की, नितीश कुमार यांनी एक शब्दही उच्चारला नाही आणि शांतपणे राज्यसभेत गेले.

राहुल गांधी पुढे म्हणाले की, भाजप तामिळनाडूमध्येही हाच बिहार मॉडेल राबवू इच्छित आहे. त्यांना येथे अशी सरकार हवी आहे जी पूर्णपणे त्यांच्या इशाऱ्यावर चालेल. त्यांना असा मुख्यमंत्री हवा आहे जो भाजप सांगेल तेच करेल. राहुल गांधी यांनी स्पष्ट शब्दांत सांगितले की, तामिळनाडूमध्ये भाजपला अशी कठपुतळी सरकार स्थापन करू देणार नाही.

पंतप्रधान नरेंद्र मोदी यांच्यावर निशाणा साधत राहुल गांधी म्हणाले की, अमेरिकेचे राष्ट्राध्यक्ष ट्रम्प खुलेआम सांगतात की, पंतप्रधान मोदी त्यांना फोन करतात आणि ‘सर’ म्हणून संबोधतात. राहुल गांधी यांनी आरोप केला की, ट्रम्प सांगतील ते करण्यास पंतप्रधान तयार असतात. उदाहरण देताना ते म्हणाले की, इराणमध्ये युद्ध सुरू होण्यापूर्वी मोदींना अचानक इस्रायलला जाण्यास सांगितले गेले आणि ते तत्काळ विमानाने तेथे रवाना झाले. राहुल गांधी म्हणाले की, भाजप कितीही स्वप्ने पाहो, तामिळनाडूतील जनता किंवा येथील सरकारला ते कधीही आपल्या नियंत्रणात घेऊ शकणार नाहीत.

---------------

हिंदुस्थान समाचार / Priyanka Bansode