रत्नागिरी, 21 एप्रिल, (हिं. स.) : मुंबई-गोवा महामार्गावरील कळंबणी (तालुका खेड) उपजिल्हा रुग्णालयासमोर आज सायंकाळी ४ च्या सुमारास भरधाव फॉर्च्युनर कारचे नियंत्रण सुटून ती थेट महामार्गालगत असलेल्या घर आणि हॉटेलमध्ये घुसली. सुदैवाने अपघाताच्या वेळी हॉटेलमध्ये कोणीही नसल्याने संभाव्य मोठी जीवितहानी टळली.
मिळालेल्या माहितीनुसार, गोव्याहून मुंबईच्या दिशेने जाणारी फॉर्च्युनर कार प्रचंड वेगात होती. चालकाचे वाहनावरील नियंत्रण सुटल्याने कारने प्रथम महामार्गालगतचा बोर्ड उडवला आणि त्यानंतर थेट रस्त्यालगत असलेल्या घर व हॉटेलमध्ये घुसली. या धडकेत हॉटेलमधील उसाच्या रस गाळण्याची मशीन, टेबल-खुर्च्या, इतर साहित्य तसेच पत्र्याची शेड संपूर्ण उद्ध्वस्त झाली. धडक इतकी जोरदार होती की परिसरात काही काळ घबराटीचे वातावरण निर्माण झाले. कळंबणी उपजिल्हा रुग्णालयाच्या समोरच हा अपघात घडल्याने घटनास्थळी नागरिकांनी मोठी गर्दी केली. सुदैवाने हॉटेलमध्ये ग्राहक किंवा कर्मचारी नसल्याने मोठी दुर्घटना टळली, अन्यथा गंभीर जीवितहानी होण्याची शक्यता व्यक्त केली जात आहे.
या अपघातामुळे काही काळ महामार्गावरील वाहतुकीवरही परिणाम झाला. घटनेनंतर स्थानिक नागरिकांनी तातडीने मदतकार्य सुरू केले. भरधाव वेग आणि निष्काळजीपणामुळेच हा अपघात घडल्याची प्राथमिक शक्यता वर्तवली जात आहे.
---------------
हिंदुस्थान समाचार / रत्नागिरी
