तेहरान, २५ एप्रिल (हिं.स.) : इराणने स्पष्ट केले आहे की परराष्ट्र मंत्री अब्बास अराघची यांच्या इस्लामाबाद दौऱ्यादरम्यान अमेरिकेसोबत कोणतीही चर्चा नियोजित नाही. अराघची यांच्या नेतृत्वाखालील इराणी शिष्टमंडळ सध्या इस्लामाबाद येथे दाखल झाले असून, हा दौरा केवळ द्विपक्षीय मुद्द्यांपुरता मर्यादित असल्याचे इराणने स्पष्ट केले आहे.

इराणच्या संसदेत राष्ट्रीय सुरक्षा आणि परराष्ट्र धोरण समितीचे प्रमुख इब्राहिम अझीझी यांनी सांगितले की, या दौऱ्याचा अणुचर्चेशी कोणताही संबंध नाही. त्यांनी सोशल मीडियावर पोस्ट करत नमूद केले की, पाकिस्तान दौरा हा केवळ द्विपक्षीय संबंध मजबूत करण्यासाठी आहे.

दरम्यान, अमेरिकेने जाहीर केले आहे की त्यांचे विशेष दूत स्टीव्ह विटकॉफ आणि व्हाईट हाऊसचे सल्लागार जेरेड कुशनर हे इराणसोबत चर्चेसाठी इस्लामाबादला भेट देणार आहेत. मात्र, इराणकडून अशा कोणत्याही बैठकीस मान्यता देण्यात आलेली नाही.

अराघची शुक्रवारी रात्री उशिरा इस्लामाबादमध्ये पोहोचले. पाकिस्तानचे परराष्ट्र मंत्री इशाक दार यांनी त्यांच्या आगमनाची माहिती दिली. या शिष्टमंडळात इराणच्या परराष्ट्र मंत्रालयाचे प्रवक्ते इस्माईल बघाई यांचाही समावेश आहे.

व्हाईट हाऊसच्या प्रेस सेक्रेटरी कॅरोलिन लिव्हिट यांनी सांगितले की, इराणने अमेरिकेसोबत समोरासमोर चर्चेची विनंती केली आहे. मात्र, इराणने याबाबत कोणतीही अधिकृत पुष्टी दिलेली नाही.

या पार्श्वभूमीवर, इस्लामाबादमधील हा दौरा प्रामुख्याने इराण-पाकिस्तान संबंधांवर केंद्रित राहणार असल्याचे स्पष्ट झाले आहे.

---------------------------

हिंदुस्थान समाचार / वृषाली देशपांडे