काठमांडू , 30 एप्रिल (हिं.स.)।नेपाळ एअरलाइन्सला सोशल मीडियावरील एका पोस्टमध्ये झालेल्या गंभीर नकाशा (कार्टोग्राफिक) चुकीमुळे माफी मागावी लागली आहे. एअरलाइन्सने त्यांच्या नेटवर्क मॅपमध्ये जम्मू आणि काश्मीर हा भाग पाकिस्तान चा भाग म्हणून दाखवला होता, ज्यामुळे मोठा वाद निर्माण झाला.

बुधवारी शेअर करण्यात आलेल्या या नकाशामध्ये आंतरराष्ट्रीय सीमांचे चुकीचे चित्रण करण्यात आले होते. ही पोस्ट समोर येताच सोशल मीडियावर अनेकांनी तीव्र आक्षेप घेतला आणि ती तथ्यात्मकदृष्ट्या चुकीची असल्याचे सांगितले. वाढत्या विरोधानंतर एअरलाइन्सने तात्काळ ही पोस्ट हटवली. यानंतर, एक्सवर अधिकृत निवेदन जारी करताना एअरलाइन्सने म्हटले की, “आमच्या सोशल मीडियावर शेअर केलेल्या नेटवर्क मॅपमधील चुकीबद्दल आम्ही मनापासून माफी मागतो. या नकाशामध्ये आंतरराष्ट्रीय सीमांबाबत गंभीर त्रुटी होत्या, ज्या नेपाळ किंवा एअरलाइन्सच्या अधिकृत भूमिकेचे प्रतिनिधित्व करत नाहीत.”

एअरलाइन्सने पुढे असेही स्पष्ट केले की, पोस्ट हटवल्यानंतर तात्काळ अंतर्गत तपासणी (इंटरनल रिव्ह्यू) सुरू करण्यात आली आहे, जेणेकरून भविष्यात अशा प्रकारची चूक पुन्हा होऊ नये. एअरलाइन्सने आपल्या निवेदनात असेही नमूद केले की, ती या प्रदेशातील सर्व शेजारी देशांबरोबर मजबूत संबंधांना महत्त्व देते. या घटनेमुळे कोणाच्या भावना दुखावल्या गेल्या असतील, तर त्याबद्दल आम्हाला खेद आहे, असेही त्यांनी स्पष्ट केले.

---------------

हिंदुस्थान समाचार / Priyanka Bansode