नवी दिल्ली, 30 एप्रिल (हिं.स.)भारतीय क्रिकेट नियामक मंडळाने (बीसीसीआय) राजस्थान रॉयल्सचा कर्णधार रियान परागवर कारवाई केली आहे. आयपीएल आचारसंहितेच्या लेव्हल १ चे उल्लंघन केल्याबद्दल रियानला त्याच्या सामना शुल्काच्या २५ टक्के दंड ठोठावण्यात आला आहे आणि एक डिमेरिट पॉइंटही देण्यात आला आहे. राजस्थान आणि पंजाब किंग्स यांच्यातील आयपीएल २०२६ च्या ४० व्या सामन्यादरम्यान रियानने आचारसंहितेचे उल्लंघन केले होते आणि आता त्याच्यावर कारवाई करण्यात आली आहे.

न्यू चंदीगड येथे पंजाब किंग्सविरुद्धच्या सामन्यादरम्यान, तो ड्रेसिंग रूममध्ये 'व्हेपिंग' करताना कॅमेऱ्यात कैद झाला होता. हा व्हिडिओ सोशल मीडियावर वेगाने व्हायरल झाला. त्यावेळी राजस्थान २२३ धावांचे लक्ष्य गाठण्याचा प्रयत्न करत होता. व्हिडिओमध्ये यशस्वी जैस्वाल, युधवीर सिंग चरक आणि कुलदीप सेन हे देखील परागच्या आजूबाजूला दिसले होते. मैदानाबाहेरील घटनेवरून राजस्थान रॉयल्स वादात सापडण्याची ही दुसरी वेळ आहे. यापूर्वी, रोमी भिंदरच्या एका उपकरणाच्या वापराचा मुद्दा समोर आला होता.

आयपीएलने एका निवेदनात म्हटले आहे, रियानने आयपीएल आचारसंहितेच्या कलम २.२१ चे उल्लंघन केल्याचे आढळले आहे, जे खेळाच्या भावनेच्या विरुद्ध वर्तनाशी संबंधित आहे. ही घटना दुसऱ्या डावादरम्यान घडली, जेव्हा तो ड्रेसिंग रूममध्ये व्हेप वापरताना दिसला. सामनाधिकारी अमित शर्मा यांनी रायनवर दंड आकारला, जो राजस्थानच्या कर्णधाराने स्वीकारला आहे. आयपीएलची प्रतिष्ठा जपण्यासाठी संघ, त्याचे अधिकारी आणि क्रिकेटपटूंवर कठोर कारवाई करण्यासाठी बीसीसीआय इतर पर्यायांचाही शोध घेत आहे.

भारतात इलेक्ट्रॉनिक सिगारेट प्रतिबंधक कायदा (पीईसीए), २०१९ अंतर्गत ई-सिगारेट आणि व्हेपिंगवर बंदी आहे. हा कायदा त्यांचे उत्पादन, विक्री, खरेदी, आयात, निर्यात आणि जाहिरात करण्यास मनाई करतो. उल्लंघन केल्यास मोठा दंड आणि तुरुंगवासाची शिक्षाही होऊ शकते.राजस्थानसाठी सध्याचा आयपीएल हंगाम चांगला चालला आहे. नऊ सामन्यांतून सहा विजय आणि तीन पराभवांसह १२ गुण मिळवून हा संघ गुणतालिकेत चौथ्या स्थानावर आहे. आता राजस्थानचा सामना १ मे रोजी दिल्ली कॅपिटल्सशी होणार आहे.

---------------

हिंदुस्थान समाचार / वृषाली देशपांडे