मुंबई, 08 एप्रिल, (हिं.स.)। भारतीय वाहन बाजारात टाटा मोटर्सने आपल्या इलेक्ट्रिक कमर्शियल वाहनांच्या सेगमेंटमध्ये मोठी भर घालत ‘टाटा इंट्रा ईव्ही पिकअप’ हा नवीन इलेक्ट्रिक पिकअप ट्रक लॉन्च केला आहे. ११.९५ लाख रुपये (एक्स-शोरूम) किंमतीत सादर करण्यात आलेले हे वाहन खास शहरातील आणि ‘लास्ट-माईल’ डिलिव्हरीसाठी डिझाइन करण्यात आले आहे. सध्या वाढत चाललेल्या ई-कॉमर्स आणि लॉजिस्टिक्स क्षेत्राच्या गरजांना लक्षात घेऊन हा पिकअप तयार करण्यात आला असून, टिकाऊ आणि पर्यावरणपूरक मोबिलिटीचा एक मजबूत पर्याय म्हणून कंपनीने त्याची मांडणी केली आहे.

टाटा इंट्रा ईव्ही पिकअप हे वाहन कंपनीच्या विद्यमान ‘इंट्रा’ प्लॅटफॉर्मवर आधारित असून, यामध्ये खास इलेक्ट्रिक पॉवरट्रेनचा वापर करण्यात आला आहे. या वाहनाची पेलोड क्षमता १,७५० किलो इतकी आहे, तर १० फूट २ इंच लांबीच्या लोड बॉडीचा पर्याय देखील देण्यात आला आहे. त्यामुळे ई-कॉमर्स डिलिव्हरी, एफएमसीजी वितरण, कोल्ड चेन लॉजिस्टिक्स तसेच वेस्ट मॅनेजमेंटसारख्या क्षेत्रांसाठी हे वाहन अत्यंत उपयुक्त ठरणार आहे.

पॉवरट्रेनच्या बाबतीत बोलायचे झाले तर, या पिकअपमध्ये ७२ किलोवॅट क्षमतेची इलेक्ट्रिक मोटर देण्यात आली आहे, जी २३० न्यूटन मीटर पीक टॉर्क निर्माण करते. हे वाहन पूर्ण लोडसह २३ टक्क्यांपर्यंत चढाई करण्यास सक्षम असल्याचा दावा कंपनीने केला आहे. यामध्ये २८.२ किलोवॅट-आवर क्षमतेचा बॅटरी पॅक बसवण्यात आला असून, त्याला आयपी६७ रेटिंग देण्यात आली आहे, ज्यामुळे धूळ आणि पाण्यापासून संरक्षण मिळते. एकदा पूर्ण चार्ज केल्यावर हे वाहन २११ किलोमीटरपर्यंत रेंज देऊ शकते.

चार्जिंग सुविधांमध्ये सीसीएस२ फास्ट चार्जिंग सपोर्ट देण्यात आला आहे. या सुविधेमुळे वाहनाची बॅटरी १० टक्क्यांपासून ८० टक्क्यांपर्यंत केवळ ५५ मिनिटांत चार्ज होते. कंपनीकडून या बॅटरीवर ६ वर्षे किंवा २ लाख किलोमीटरपर्यंतची वॉरंटी दिली जात आहे, ज्यामुळे ग्राहकांना अधिक विश्वासार्हता मिळते.

सुरक्षेच्या दृष्टीने या वाहनात इलेक्ट्रॉनिक ब्रेकिंग सिस्टम आणि तीन स्तरांची रिजनरेटिव्ह ब्रेकिंग सुविधा देण्यात आली आहे, ज्यामुळे ऊर्जा बचत होते आणि वाहनाची रिअल-वर्ल्ड रेंज सुधारते. याशिवाय, टाटा मोटर्सच्या ‘फ्लीट एज’ टेलीमॅटिक्स सिस्टममुळे फ्लीट ऑपरेटर्सना रिअल-टाइम ट्रॅकिंग, वाहनाची स्थिती आणि प्रेडिक्टिव मेंटेनन्सची माहिती सहज उपलब्ध होते.

इंटीरियरच्या बाबतीत, या पिकअपचा केबिन वापरण्यास सोपा ठेवण्यात आला असून वॉक-थ्रू लेआउट आणि इलेक्ट्रिक पॉवर-असिस्टेड स्टीयरिंग यांसारख्या सुविधा देण्यात आल्या आहेत. इलेक्ट्रिक ड्राइव्हट्रेनमुळे पारंपरिक डिझेल वाहनांच्या तुलनेत आवाज, कंपन आणि कठोरता (एनव्हीएच) कमी राहते, ज्यामुळे ड्रायव्हिंग अधिक आरामदायी होते.

टाटा मोटर्सने या वाहनासाठी देशभरात मजबूत ईव्ही इकोसिस्टम उभारली असून २५,००० हून अधिक चार्जिंग पॉइंट्स आणि २०० पेक्षा जास्त विशेष ईव्ही सर्विस सेंटर्सचा सपोर्ट उपलब्ध करून दिला आहे. याशिवाय, विविध बँका आणि एनबीएफसीच्या माध्यमातून ग्राहकांना फायनान्सिंगचे पर्यायही उपलब्ध करून देण्यात येणार आहेत. या सर्व सुविधांमुळे ‘टाटा इंट्रा ईव्ही पिकअप’ हा भारतीय कमर्शियल वाहन बाजारात एक महत्त्वाचा टप्पा ठरणार असल्याचे स्पष्ट दिसते.

---------------

हिंदुस्थान समाचार / Suraj Chaugule